Ով և ինչ է փորձում կառուցել Սայաթ-Նովա 10/5 հասցեում

Վերջին շրջանում լրատվական դաշտը ողողվեց Սայաթ Նովա 10, 12 շենքերի տարածքում կառուցվող շինության վերաբերյալ տեղի բնակիչների բողոքներով: Այդ հասցեում գտնվող կաթսայատան տարածքում «ԼԱՐԿՈ գրուպ» ՍՊԸ-ն քաղաքապետարանից շինություն կառուցելու թույլտվություն է ստացել և այս օրերին փորձում է 5 հարկանի բազմաֆունկցիոնալ շենք կառուցել: Բնակիչները բողոքում են` պատճառաբանելով, թե տեղում կառուցվող շենքն իրենց անհարմարություններ կպատճառի:

Այս առիթով Lurer.com-ի թղթակիցը զրուցեց «ԼԱՐԿՈ գրուպ» ՍՊԸ-ի փաստաբան Աշոտ Աբրահամյանի հետ.

«ԼԱՐԿՈ գրուպ» ՍՊԸ-ն այդ տեղամասում գնել է կաթսայատուն` իր հողատարածքով: Քաղաքաշինության մասին ՀՀ օրենքով սահմանված կարգով` ստացել է համապատասխան ճարտարապետահատակագծային առաջադրանք, պատվիրել է նախագիծ, փորձաքննությունից հետո ստացել է շինթույլտվություն և որոշել է իրականացնել կառուցապատման աշխատանքներ: Ամբողջ իրավական բազան` ՀՀ օրենքներին համապատասխան, գոյություն ունի»,- ասաց փաստաբանը:

Նրա խոսքով` բողոքի ակցիաները սկսվել են այն ժամանակ, երբ «ԼԱՐԿՈ գրուպ» ՍՊԸ-ն` որպես օրինավոր կառուցապատող, նախաձեռնել է իրականացնել համապատասխան աշխատանքները: Կառուցապատողի աշխատանքներին դեմ արտահայտող բնակիչների պատճառաբանությունները դուրս են իրավական հարթությունից, և ապօրինության մասին խոսք լինել չի կարող:

«ԼԱՐԿՈ գրուպ» ՍՊԸ-ն Երևանի քաղաքապետարանից որևէ գույք չի ձեռք բերել: Ընկերությունը մասնավոր անձից ձեռք է բերել հողամաս` կաթսայատնով: Դա եղել է հին կաթսայատուն, որը չի գործել, չի գործում և գտնվում է անմխիթար վիճակում»,-գտնում է փաստաբանը և հավելում, որ նախագիծը փորձաքննությունն անցել է մասնագիտացված, լիցենզավորված կազմակերպության միջոցով, որը դրական եզրակացություն է տվել:

«Այն անձինք, ովքեր աղմուկ են բարձրացնում այս հարցի շուրջ, առաջին հերթին թող իրենք օրինապաշտ լինեն, օրինակ` նրանք, որ կառուցել են անօրինական հենապատ, որը զուգորդվել է, իմ կարծիքով, հողազավթմամբ` նեղացնելով առկա ճանապարհը: Թե հիմա այստեղ ինչ շահեր կան, և ինչու են այդ մարդիկ դեմ, մեզ համար անհասկանալի է:

Բացի այդ, կա մի խնդիր ևս. եթե կառուցապատողը շինթույլտվություն ստացել և ժամկետներում չի իրականցնում նախագծով նախատեսված շինության կառուցում, ընկնում է վարչական խոշոր տուգանքների տակ` սկզբում կառուցվող շինության նախահաշվի 1 %-ի չափով, իսկ հետո, եթե չի իրականացվում շինարարությունը, շինությունը հանվում է վաճառքի:

Մենք խնդրել ենք այդ մարդկանց խոչընդոտներ չստեղծել, որովհետև մենք այդ վնասների հատուցումը ստիպված կլինենք պահանջել իրենցից: Եթե որևէ մեկը խոչընդոտում է օրինական կառուցապատման աշխատանքները, դա նշանակում է` պետք է դատական կարգով փոխհատուցի խոշոր վնասները»,- ասաց Աշոտ Աբրահամյանը:

Բողոքի մասնակիցների մեծ մասը համարում էին, որ շինությունը կխանգարի տեղակայված ավտոտնակներին: Աշոտ Աբրահամյանին հարց ուղղեցինք. «Բնակիչների ավտոտնակները տեղափոխելու խնդիր կառաջանա՞»:

Պատասխանեց.

- Խոսքը գնում է առկա ստորգետնյա ավտոտնակների մասին: Դրանք ինչպես կան, այդպես մնալու են: Բացի այդ` ստորգետնյա ավտոտնակի վերևում, պետք է խաղահրապարակ լիներ, բայց բնակիչները դա օգտագործում են որպես ավտոտոկայանատեղի, այսինքն` բնակիչները հրաժարվել են այդ տարածքից, երբ խոսում են խաղահրապարակի բացակայության մասին: Բայց ընկերությունը հայտարարել է, որ պատրաստ է բնակիչների համար խաղահրապարակ կառուցել, բայց ոչ կաթսայատան տեղը (այն չի կարող խաղահրապարակ դառնալ): Ավտոկայանատեղերի համար, ըստ էության, իրականցվելիք շինարարությունը որևէ խոչընդոտ չի ստեղծում»,-ասում է նա և վերջում հավելում,-«ԼԱՐԿՈ գրուպ» ՍՊԸ-ն` որպես օրինապաշտ կազմակերպություն, ուզում է հարցերը լուծել միայն օրենքի սահմաններում: Որևէ դատական հայց չկա «ԼԱՐԿՈ գրուպ» ՍՊԸ-ի դեմ այդ բնակիչների կողմից: Եթե իրենք հայտարարում են, թե ընկերությունն ապօրինություն է անում, խախտվել են իրենց իրավունքները, կարող են դատական կարգով վիճարկել շինթույլտվությունը:

Lurer.com-ի թղթակիցը նաև հարցում է ուղարկել Երևանի քաղաքապետարան` ճշտելու` արդոք այս ընկերությունը ստացել է շինթույլտվություն, ունի ողջ իրավական բազան: Երևան քաղաքի գլխավոր ճարտարապետի աշխատակազմից մեզ տեղեկացրին` Սայաթ-Նովա 10/5 հասցեում նախատեսվող շինության կառուցման համար առկա է Երևանի քաղաքապետարանի կողմից համաձայնեցված հ. 01/18-05/2-40225-640 նախագիծը և կառուցապատող «Լարկո գրուպ» ՍՊԸ-ին տրված` հ. 01/18-40225-683 շինարարության թույլտվությունը:

Միաժամանակ տեղեկացնում են, որ վերը նշված նախագիծն անցել է կրկնակի փորձաքննություն, որի հիման վրա տրվել է մասնագիտական դրական եզրակացություն:

Ն. Ա.

Լուսանկարում վերակառուցման ենթակա տարածքն է.