«Պարազիտներ ու պորտաբույծներ». Մանվել Բադեյանը` նպաստառուների մասին

ՀՀԿ-ական պատգամավոր Մանվել Բադեյանն այսօր լրագրողների հետ հանդիպման ընթացքում խոսել է գործազրկության նպաստների կասեցման որոշման մասին: Պատգամավորն այդ որոշումը որակել է որպես շատ ճիշտ որոշում:

«Կան մարդիկ, որոնք համաձայն են չնչին գումար ստանալ, միայն թե չաշխատեն, դրանք հասարակության մարմնի վրա գտնվող պարազիտներ են. հասարակությունը պարտավոր չի այդ պորտաբույծներին պահել: Ի վերջո, այդ նպաստները տրվում են պետբյուջեից, այսինքն՝ մեր վճարած հարկերից»,-ասել է Բադեյանը։

Պատգամավորն ասել է, որ ինքը զբաղվում է բիզնեսով և լավ գիտի, որ աշխատատեղեր ինչքան ասես կան, պարզապես մեր ժողովրդի մեջ արմատավորվել է ուրիշի հաշվին ապրելու սովորույթը։ Իսկ այն միջոցները, որոնք մինչ այս տրվում էին ժողովրդի անապահով խավին՝ որպես գործազրկության նպաստ, տրամադրվելու են նոր աշխատատեղերի ստեղծման, մարդկանց վերապատրաստման համար, որ այն մարդիկ, ովքեր ուզում են աշխատել, կարողանան աշխատանք գտնել:

Իր հերթին տնտեսագետ Վարդան Բոստանջյանն ասել է, որ պետության կողմից այդ քայլը համարում է անթույլատրելի՝ ասելով, որ այնպիսի մի երկիր, որտեղ աղքատությունը կազմում է 35 տոկոս, իրավունք չունի վերացնել գործազրկության նպաստը: Տնտեսագետը նաև ասել է որ մինչև որոշումը կայացնելը պարտավոր էին գործազուրկների համար պայմաններ ստեղծել, որովհետև բոլորս էլ գիտենք, որ աշխատատեղեր չկան։