«Բորուսիայում» սկսվել է Մխիթարյանի ժամանակաշրջանը. Հենեկե

Գերմանական Kicker պարբերականի լրագրող Թոմաս Հենեկեն sport-express-ին տված հարցազրույցում անդրադրաձել է Հենրիկ Մխիթարյանին.

«Ինչպես նշել է Կլոպը, «Շալկեի» հետ խաղում 3-րդ գոլը իսկապես համաշխարհային մակարդակի էր: Ֆանտաստիկ անցում էր Մխիթարյանի կատարմամբ: Շատ լավ եմ հիշում Մխիթարյանի հետ առաջին զրույցս, նա ասաց, որ կարող է շատ վազել: 

Հենրիկը ֆենոմեն է, ֆուտբոլիստ ադամանդ: Ուկրաինայի առաջնությունում նա շատ գոլեր է հեղինակել, գոլային փոխանցումներ կատարել: Այդ պատճառով էլ Գերմանիայում նույնպես նրանից ակնկալիքներ ունեին: Նա շատ արագ հարմարվեց թիմին: Առաջին խաղերում

Մխիթարյանն այնպես էր հանդես գալիս, կարծես թե նա արդեն երկու-երեք տարի Դորտմունդում է: Կարծում եմ` նա երջանիկ է: Հավանաբար, նա չի փոշմանել տեղափոխության համար: Կլոպը միանշանակ գոհ է նրանից: Բոլորն են ակումբում նրանից գոհ՝ Վացկեն, Ցորկը: Մխիթարյանն արագ խաղացող է, տիրապետում է հիանալի տեխնիկայի և ավարտին է հասցնում գրոհները: Կարծում եմ` նա կարողացավ փոխարինել Գյոտցեին: Սակայն նա այլ խաղաոճ ունի, և տեղին չէ նրանց համեմատելը: Ընդհանուր առմամբ` կարելի է ասել` «Բորուսիան» կարողացավ այդ դիրքում հիանալի խաղացող գտնել: Դորտմունդում այլևս Գյոտցեի մասին չեն խոսում: Կարելի է ասել` Գյոտցեի ժամանակաշրջանն ավարտվել է և սկսվել է Մխիթարյանինը: Գյոտցեն հիանալի ֆուտբոլիստ է, սակայն այժմ այդ դիրքում խաղում է մի ֆուտբոլիստ, ով ոչնչով չի զիջում նրան: Նա շատ արագ ընդունվեց երկրպագուների կողմից: Երկրպագուները նրան սիրում են: Չգիտեմ` ինչ ակնկալիքներ ունի Կլոպը նրանից, մարզիչն արդեն իսկ գոհ է այդ ֆուտբոլիստի խաղից: Կլոպը նրան գնահատում է նաև որպես ունիվերսալ խաղացող»,-նշել է Հենեկեն: