Ներկայացվեցին թունաքիմիկատների գերեզմանոցի ուսումնասիրության արդյունքները

Այսօր Երևանում տեղի ունեցավ «Նուբարաշենի ժամկետանց պեստիցիդների և կայուն օրգանական աղտոտիչների գերեզմանոցի տարածքի գնահատում և իրագործելիության ուսումնասիրություն» թեմայով աշխատանքային հանդիպում:

Այն կազմակերպել էին ՀՀ ԱԻ նախարարությունը և ԵԱՀԿ երևանյան գրասենյակը:

Հիմնական նպատակն էր համախմբել թունաքիմիկատների գերեզմանոցի տարածքի գնահատման և վերականգնման հետ առնչվող ծրագրերում ներգրավված շահառու կողմերին:

Նուբարաշենի թունաքիմիկատների գերեզմանոցը հիմնվել է 1970-ական թվականներին՝ որպես կայուն օրգանական աղտոտիչների թափոնների կուտակման վայր և գտնվում է սողանքային գոտում: ՀՀ կառավարությունը ձեռնարկել է մի շարք միջոցառումներ այն վերանորոգելու համար, սակայն տարածքը շարունակում է ռիսկեր պարունակել շրջակա միջավայրի և մարդկային առողջության համար:

Բացման խոսքում ԵԱՀԿ երևանյան գրասենյակի ղեկավար, դեսպան Անդրեյ Սորոկինը նշեց.
- Հաշվի առնելով շրջակա միջավայրի և անվտանգության խնդիրների փոխկապակցվածությունը՝ ԵԱՀԿ-ն շրջակա միջավայրի պաշտպանության սպառնալիքների կանխարգելման ոլորտում իրականացրել է մի կարևոր ծրագիր: Դրա շրջանակներում հավաքվել են մանրամասն տվյալներ՝ Նուբարաշենի գերեզմանոցի թունավոր թափոնների սահմանների, ծավալի և բաղադրության մասին, ինչը թույլ է տվել ճշգրիտ գնահատական տալ շրջակա միջավայրին սպառնացող վնասների ռիսկայնության մակարդակի վերաբերյալ:

ՀՀ ԱԻ նախարար Արմեն Երիցյանն իր ելույթում մասնավորապես ասաց.
- 2011 թ. ԵԱՀԿ-ն և ՀՀ արտակարգ իրավիճակների նախարարությունը համաձայնագիր են ստորագրել՝ նպատակ ունենալով համագործակցել խնդրին երկարաժամկետ լուծումներ տալու ուղղությամբ: Այժմ, երբ ԵԱՀԿ նախաձեռնությամբ գերեզմանոցի գնահատման ուսումնասիրությունն ավարտված է, մենք ունենք փորձագիտական տեղեկություններ, որոնք հիմք կհանդիսանան Նուբարաշենի թունաքիմիկատների տարածքի վերականգնման հետագա գործողությունների համար: Մենք առաջարկել ենք խնդրի լուծման փուլային տարբերակը: Օգտվելով առիթից՝ ուզում եմ շնորհակալություն հայտնել ԵԱՀԿ-ին, ինչպես նաև բոլոր միջազգային ու հասարակական կազմակերպություններին, որոնք այս ընթացքում եղել են մեր կողքին:

Հանդիպմանը ներկայացվեցին ԵԱՀԿ աջակցությամբ երկու տարվա ընթացքում իրականացվող ծրագրի արդյունքները՝ Երևանի շրջակայքում գտնվող Նուբարաշենի գերեզմանոցում ժամկետանց պեստիցիդների և կայուն օրգանական աղտոտիչների աղտոտվածության աստիճանի և շրջակա միջավայրի վրա դրանց ազդեցության ուսումնասիրությունը:

Քննարկմանը ներկա էին ծրագրի հիմնական շահագրգիռ կողմերը՝ տարբեր պետական մարմինների, միջազգային և հասարակական կազմակերպությունների ներկայացուցիչներ:

Թունաքիմիկատների գերեզմանոցի տարածքի գնահատման և վերականգնման հնարավոր սցենարները ներկայացրեց նիդեռլանդական «Թաուվ» (Tauw) ընկերության ներկայացուցիչ Բուդվին Ֆոկեն: Կազմակերպությունն իրականացրել է ծրագրի իրագործելիության ուսումնասիրություն, ինչպես նաև բնապահպանական և առողջապահական ռիսկերի գնահատում:

Ծրագիրն իրականացրել են ՀՀ ԱԻ նախարարությունը և ԵԱՀԿ երևանյան գրասենյակը՝ ԱՄՆ կառավարության ֆինանսավորմամբ: