Նոյեմբերի 4-ին ազատամարտիկները կվերսկսեն ընդհատված նստացույցը

Շուրջ հինգ ամիս տևող պայքարով չհաջողվեց հասնել դրական արդյունքի: Իշխանությունները, հավատարիմ մնալով իրենց գործելաոճին, գնացին խաբեության ճանապարհով: Տարբեր գերատեսչություններում հանդիպումներ կազմակերպելով, հանձնաժողով ստեղծելով, խոստումներ տալով' ձգձգում են հարցի լուծումը: Այդ ընթացքում նրանք փորձեցին պառակտել շարժումը, սակայն չկարողանալով խոչմդոտել մեր գործունեությանը, դիմեցին ավելի կտրուկ և ստոր միջոցի: Կեղծ մեղադրանք ներկայացնելով` ազատազրկեցին շարժումն սկսող և փաստացի ղեկավարող' պահեստազորի գնդապետ Վոլոդյա Ավետիսյանին, համոզված լինելով, թե այդպիսով կկազմալուծեն մեր շարքերը: Հույս ունեին նաև, թե ստիպված կլինենք կենտրոնանալ կալանված մեր ընկերոջն ազատելու գործընթացի վրա և կհեռանանք բուն նպատակից:
Սակայն իշխանությունները սխալվեցին: Իրենց սխալ հաշվարկված գործողությունների շնորհիվ նրանք ստվեր գցեցին իրենց հեղինակության վրա նաև ավելի ուժեղացրին մեր շարքերը:

Իշխանությունները մեր պահանջները չբավարարելու համար պատճառ էին բերում հանրապետության աղքատ վիճակը, անհրաժեշտ ֆինանսների բացակայությունը, սակայն, ինչպես տեսանք, միջոցներ գտան պետական ծառայողների աշխատավարձը բարձրացնելու համար, մեկնաբանելով, որ դա պետության հեղինակության հարց է: Այսինքն հետո ինչպե՞ս հավատանք, որ պետության գանձարանում անհրաժեշտ միջոցներ չկան` բավարար կենսամակարդակ ապահովելու իրենց կյանքն ու առողջությունը հայրենիքի պաշտպանությանը նվիրած Ազատամարտիկների համար: Իսկ դա պետության հեղինակության հարց չէ՞:

Իշխանությունների քայլերը մենք համարում ենք պետության անվտանգությունը թուլացնող հանցագործություն և անընդունելի: Հավաստիացնում ենք, որ այսօր ավելի միասնական ու վճռական ենք' մեր նպատակին հասնելու համար: Նոյեմբերի 4 ին Ազատության հրապարակում վերսկսելու ենք ժամանակավորապես ընդհատված նստացույցը և զուգահեռ դիմելու ենք պայքարի ավելի կտրուկ քայլերի:
Մեկ անգամ ևս հայտարարում ենք, որ քաղաքական դաշտ չենք մտնելու: Մեր պայքարը կրում է միայն սոցիալական բնույթ և կավարտվի միայն Արցախյան ազատամարտի մասնակիցների համար բավարար կենսամակարդակ ապահովելուց հետո:

Ազատամարտիկների խորհուրդ