19 ՀԿ-ներին կտրվի դրամաշնորհ ստանալու հնարավորություն

Հոկտեմբերի 29-ին և 30-ին ՀՀ Նախագահի գործընկեր կազմակերպության' Հայաստանի երիտասարդական հիմնադրամի կողմից հայտարարված դրամաշնորհների ծրագրերի մրցութային հանձնաժողովի (հանձնաժողովի կազմը ներկայացվում է ստորև) նիստերում քննարկվեցին ՀՀ նախագահի աշխատակազմի կողմից հատկացվող դրամաշնորհների համար դիմած 19 հասարակական կազմակերպությունների հայտերը:

Հանձնաժողովի անդամները, առանձին-առանձին անդրադառնալով բոլոր փաթեթներին, ներկայացրին իրենց նկատառումները։

Հանձնաժողովի անդամ, Հայաստանի երիտասարդական հիմնադրամի հոգաբարձուների խորհրդի համակարգող Կարեն Ավագյանն առաջարկեց ծրագրեր ներկայացրած բոլոր հասարակական կազմակերպություններին տալ դրամաշնորհ ստանալու հնարավորություն՝ պայմանով, որ սահմանված ժամկետում կվերացնեն ծրագրերում նկատված տեխնիկական թերությունները։ Հանձնաժողովը միաձայն կողմ քվեարկեց առաջարկին։

Կարեն Ավագյանը միաժամանակ նշեց, որ խստորեն վերահսկվելու է ծրագրերի իրականացման ընթացքը, և մանրազնին ուսումնասիրվելու են հաշվետվությունները։ Մոնիթորինգի ընթացքում եթե պարզվի, որ ծրագիրն անցկացվում է խախտումներով և շեղումներով, կազմակերպությանը հատկացված գումարը հետ կգանձվի։

Հանձնաժողովի անդամ, Հայաստանի ամերիկյան համալսարանի Առողջապահական ծառայությունների հետազոտման և զարգացման կենտրոնի հակածխախոտային ծրագրերի ղեկավար Նարինե Մովսիսյանը նշեց, որ ՀՀ Նախագահի նախորդ գործընկեր կազմակերպության հետ կապված կա բավականին տխուր փորձ, որը, չնայած Հայաստանն առանց ծխախոտի դաշինքի բազմաթիվ նամակներին, ոչ մի կերպ չէր գնում համագործակցության։ Այս համատեքստում նա ողջունեց աշխատանքներն իրականացնելու ներկա ձևաչափը. ՙՀայաստանի երիտասարդական հիմնադրամի հետ համագործակցության սկիզբն արդեն դրված է, և հուսով եմ՝ այն կստացվի՚։

ՀՀ առողջապահության նախարարության Առողջապահության ազգային ինստիտուտի տեղեկատվական և վերլուծական հարցերով փոխտնօրեն Ալեքսանդր Բազարչյանը, գնահատելով ՀԿ-ների ծրագրերը, նշեց. ՙՀետաքրքիր մտքեր կային գրեթե բոլոր ծրագրերում, պարզապես դրանցում տեղ էին գտել որոշակի տեխնիկական վրիպակներ, որոնք շտկման կարիք ունեն։ Ես վստահ եմ, որ հետագայում է՜լ ավելի կբարձրանան ծրագրերի որակը, և կավելանա դիմողների թիվը։ Ես համոզված եմ նաև, որ բոլոր ՀԿ-ներին դրամաշնորհ ստանալու հնարավորություն տալը կունենա դրական արդյունք։ Այսօր ՀԿ սեկտորին, հատկապես հակածխախոտային դաշտում, արթնացնելու խնդիր կա։ Եվ այս նախաձեռնությունը միանշանակորեն ուղղված էր ՀԿ-ների գործունեության ակտիվացման բարձրացմանը՚,- նշեց Ալեքսանդր Բազարչյանը։

+++

ՀՀ Նախագահի գործընկեր կազմակերպության' Հայաստանի երիտասարդական հիմնադրամի կողմից հայտարարված դրամաշնորհների ծրագրերի մրցութային հանձնաժողովի կազմը՝

1. Ավետիս Բերբերյան-ՀՀ Նախագահի օգնական (Հանձնաժողովի նախագահ, մշտական անդամ)

2. Կարեն Ավագյան-ՀԵՀ հոգաբարձուների խորհրդի համակարգող (Մշտական անդամ)

3. Արուսյակ Պողոսյան-ՀԵՀ ծրագրերի իրականացման ծառայության ղեկավար (Հանձնաժողովի քարտուղար, մշտական անդամ)

4. Ալիկ Բեժանյան-ՀԵՀ գլխավոր հաշվապահ (Մշտական անդամ)

5. Ալեքսանդր Բազարչյան-ՀՀ ԱՆ Առողջապահության ազգային ինստիտուտի տեղեկատվական և վերլուծական հարցերով փոխտնօրեն (Ոլորտային անդամ)

6. Հայկ Գալստյան-ՀՀ տարածքային կառավարման նախարարության աշխատակազմի տարածքային կառավարման և զարգացման վարչության պետ (Ոլորտային անդամ)

7. Արփինե Հակոբյան-«ՀԿ կենտրոն» քաղաքացիական հասարակության զարգացման ՀԿ (Ոլորտային անդամ)

8. Նարինե Մովսիսյան-Հայաստանի ամերիկյան համալսարանի Առողջապահական ծառայությունների հետազոտման և զարգացման կենտրոնի հակածխախոտային ծրագրերի ղեկավար (Ոլորտային անդամ)

Հայաստանի երիտասարդական հիմնադրամի հասարակայնության հետ կապերի ծառայություն