ԱՄՆ ԱԱԳ-ն հերքում է համացանցային լրտեսման հետ կապված լուրերը

ԱՄՆ-ի Ազգային անվտանգության գործակալության (ԱԱԳ) ղեկավար Քիթ Ալեքսանդերը պաշտոնապես հերքել է այն տեղեկությունները, թե իր գերատեսչությունը ապօրինաբար հետեւել է Yahoo! եւ Google համացանցային ընկերությունների գործունեությանը: Այդ մասին հաղորդում է CNN հեռուստաընկերությունը:

ԱԱԳ-ի ղեկավարը «բացարձակ անճշտություն» է անվանել այն տեղեկատվությունը, թե ապօրինաբար կորզվել են համացանցային ընկերությունների սերվերներում պահվող տվյալները: «Համացանցային ընկերությունների սերվերներից մենք տեղեկություններ ստանում ենք լոկ այն պատճառով, որ նրանք համագործակցում են մեզ հետ: Նրանք պարտավոր են մեզ հետ համագործակցել ոչ թե դատարանի խնդրանքի կապակցությամբ, այլ այն պատճառով, որ դա իրենց անմիջական պարտականությունն է: Այս առումով միանգամայն հստակ ցուցումներ կան դատարանի որոշումներում», հայտարարել է Ալեքսանդերը Վաշինգտոնումՙ կիբեռանվտանգությանը նվիրված կոնֆերանսում:

Հատուկ ծառայության ղեկավարը նաեւ հայտնել է, որ գործակալությունը երբեք չի «կոտրել» համացանցային ընկերություններին պատկանող տվյալների զետեղարանները: «ԱԱԳ-ն չի զբաղվում նման «կոտրանքներով»: Դա անօրինական է: Մենք միշտ գնում ենք ՀԴԲ-ի գծով դատական կարգադրություններ ստանալու ճանապարհով: Եվ նման կարգադրությունների քանակը մամուլի հաղորդածից զգալիորեն քիչ է. խոսքը ոչ թե միլիոնների, այլ հազարների մասին է: Դրանք գրեթե բոլորը կապված են ահաբեկչական սպառնալիքի հետ եւ չեն վերաբերում ԱՄՆ-ի քաղաքացիներին», ընդգծել է հետախուզական գերատեսչության ղեկավարը:

Ավելի վաղՙ հոկտեմբերի 30-ին «Վաշինգտոն փոստ» թերթի հրապարակած տեղեկությունների համաձայն, ԱԱԳ-ն կորզում է Yahoo!-ի եւ Google-ի սերվերներում պահվող տվյալները: Նյութի հեղինակները վկայակոչում էին ԱԱԳ եւ ԿՀՎ նախկին աշխատակից Էդվարդ Սնոուդենի տրամադրած փաստաթղթերը:

Թերթի հրապարակած տվյալների համաձայն, ԱԱԳ-ն համացանցային ընկերությունների կառույցներ է թափանցել MUSCULAR համակարգի միջոցով: Ըստ «Վաշինգտոն փոստի» տեղեկությունների, համակարգը 30-օրյա ժամանակահատվածում մշակել է համացանցով դրա օգտատերերի ուղարկած տեքստային եւ ձայնային նյութերին առնչվող շուրջ 180 մլն զանազան գրանցումներ: MUSCULAR-ի հավաքած տեղեկությունները հասանելի են եղել նաեւ Կառավարական կապի բրիտանական կենտրոնին (GCHQ):

Մանրամասները` «Ազգ»-ի այսօրվա համարում: