«Եթե 3-5 հազար իմ պատկերացրած տղերքը գան... ». Շանթը հավատում է

Հարցազրույցներ 1 Նոյեմբեր, 2013 20:10

Ինչպես արդեն տեղեկացրել էինք, «Ցեղակրոն» կուսակցության նախագահ Շանթ Հարությունյանը Երեւանի Ազատության հրապարակում նստացույց է անում` «Ես սկսում եմ հեղափոխությունը» գրությամբ ցուցապաստառով:

Ինչո՞ւ հեղափություն: Այս հարցը Lurer.com-ի թղթակիցն այսօր ուղղեց Շանթ Հարությունյանին.

-Այսօր Հայաստանում ուրիշ ձև չկա այն արժեքները հաստատելու համար, որոնք հատուկ են նորմալ պետություն ունեցող ժողովուրդներին: Մեր երկրին արժեքային հեղափոխություն է պետք իրականացնել: Ժողովուրդը դժգոհում է, բայց չգիտի` ինչից է դա: Մտածում են` պրեզիդենտին է պետք փոխել կամ պրեզիդենտական համակարգը դարձնել վարչապետական: Ես կարծում եմ` արժեքներն են այստեղ դեգրադացված, իսկ նոր և բարձր արժեք հաստատելու համար միայն հեղափոխություն է պետք:

Հեղափոխություն անելու խնդիրը կլուծեմ հեղափոխություն անելով:

-Ինչո՞ւ հենց Ազատության հրապարակում:

- Տեղանքը կապ չունի: Ես կարող էի որոշել գնալ ծառերի տակ նստել: Ի վերջո ես մի տեղ պետք է նստեի ու հայտարարեի` հենց այստեղից եմ սկսում հեղափոխությունը: Գուցե մարդիկ գան ու միանան, մտածեն որ իրենք մենակ չեն, Շանթն արդեն սկսել է, ու գան այստեղ: Կրկնում եմ, կարող էի այստեղ չգտնվել և նստել արձանի գլխին, եթե դա խուլիգանություն չհամարվեր: Կա՞ մարդ, որ հեղափություն ուզում է, թող իմանա, գա: Ես կոչ չեմ անում. ո’ր մի նորմալ մարդը կոչ կանի, կասի` եկեք մեռնելու: Դա այնպիսի բան է, որ ամեն մի քաղաքացի պետք է որոշում կայացնի` պատրա՞ստ է գնալու արժեքների համար մեռնելու: Ես ոչ մեկին չեմ կարող ստիպել, որ ընդունի` ո’րն է իր համար արժեք:

-Ինչքա՞ն ժամանակ եք մնալու Ազատության հրապարակում:

-Հեղափոխությունը հենց պրծնենք, հաղթենք, գնալու ենք տուն: Դե էնպես չի, որ, ասենք, 5 ամիս նստեմ ստեղ մտածեմ` հեղափոխություն եմ անելու: Կոնկրետ օր չեմ որոշել, բայց ընդհանուր առմամբ` 15-45 օր:

-Հաղթանակի նախադրյալներ ունե՞ք:

- Ես հիմա չեմ կարող ասել: Այն ակնկալիքները, որ ունեի, ավելին իրագործվեց այս երկու օրվա մեջ: Ես այնքան հավատ չունեմ, որ իմ պատկերացրած քանակն ու շերտը կլինի այստեղ: Շատ ու քիչը կարևոր չէ: Մարդիկ են եղել, ավելի շատ մարդիկ են բերել, բայց ոչինչ չեն կարողացել անել, բայց եթե 3-5 հազար իմ պատկերացրած տղերքը գան, կհասնենք մեր ուզածին:

Շանթ Հարությունյանը նաև շնորհակալություն հայտնեց լրագրողների ուշադրության և սրտացավության համար: