ՀՀԿ-ԲՀԿ հերթական «փոխհրաձգությունը». կենաց-մահու կռիվ Արարատում

Այս տարվա օգոստոսի 15-ին մահացավ Արարատի քաղաքապետ Աբրահամ Բաբայանը, և նշանակվեցին համայնքի ղեկավարի նոր, արտահերթ ընտրություններ: Նոյեմբերի 10-ին տեղի ունենալիք Արարատի քաղաքապետի ընտրությունները խոստանում են ամենաթեժը լինել Հայաստանում երբևէ տեղի ունեցած ՏԻՄ ընտրություններից: Ընտրություններին գրանցված են երկու թեկնածուներ՝ «Բարգավաճ Հայաստան» կուսակցությունից առաջադրված ԲՀԿ-անդամ, «Արարատցեմենտ» ՓԲԸ-ում արտադրության պետ Սամվել Բարսեղյանը և Հայաստանի հանրապետական կուսակցությունից առաջադրված, «Արտաշատի ավտոկայան» ՍՊԸ-ի տնօրեն, ՀՀԿ-ական Հայկ Հայկյանը:

Այս ընտրությունների ինտրիգն այն է, որ երկու թեկնածուներին սատարում են գրեթե հավասարազոր ուժեր, որոնք, կարելի է ասել, կենաց - մահու պայքարի են դուրս եկել միմյանց դեմ: ՀՀԿ-ն, իհարկե, անմասն չի մնում վարչական ռեսուրսի կիրառումից, սակայն մյուս կողմը գործի է դրել ոչ պակաս արժեքավոր ռեսուրս` շուրջ 2000 աշխատակից ունեցող «Արարատցեմենտ» գործարանը, որը պատկանում է ԲՀԿ առաջնորդ Գագիկ Ծառուկյանին: Ընդ որում, երկու կողմն էլ փոխադարձաբար միմյանց մեղադրում են ապօրինի միջոցներով քարոզարշավ վարելու, մարդկանց աշխատանքից ազատելու, փող բաժանելու համար մարդկանց ցուցակագրելու և այլ, մեր իրականության բաղկացուցիչ մաս կազմող, մեղքերի մեջ:

Կրքերը այնքան են թեժացել, որ գործի են դրվել քարոզչական բոլոր հնարավորությունները, հրապարակային լեզվակռիվը խրախուսվում է ամենաբարձր դեմքերի մակարդակով:

Արարատի մարզպետ Արամայիս Գրիգորյանը խորհրդարանում հայտարարեց, որ Արարատի ցեմենտի գործարանում աշխատանքից ազատել են այն աշխատակիցներին, ովքեր պատրաստակամություն են հայտնել Արարատի քաղաքապետի ընտրություններում աջակցել ՀՀԿ թեկնածու Հայկ Հայկյանին: «Արդեն ցեմենտի գործարանի երկու աշխատակից ինձ դիմում են ներկայացրել»,- ասաց մարզպետը:

Իսկ ԱԺ ԲՀԿ խմբակցության քարտուղար Նաիրա Զոհրաբյանը «Հայկական ժամանակին» ասել է, որ քարոզարշավն ընթանում է օրենքի կոպտագույն խախտումներով: Ըստ Զոհրաբյանի, քաղաքում բաժանվում էին ՀՀԿ-ի թեկնածու Հայկ Հայկյանի բուկլետները, որոնք իրենց մեջ ունեն ներդիր: «Ներդիրում նշված են Արարատում Գրիգորյան եղբայրների կողմից կատարած աշխատանքները: Ընդ որում, այդ բոլոր աշխատանքները կատարվել են բյուջեի միջոցներով»,- ասաել է Զոհրաբյանը և հավելել.«Սա օրենքի կոպտագույն խախտում է եւ բնականաբար, մեր թեկնածուի շտաբն այն անարձագանք չի թողնելու»: Պատգամավորը ևս մեկ օրինախախտման մասին է խոսել` նշելով, որ Արարատի քաղաքապետարանը հրաժարվում է իրենց հրապարակ տրամադրել` պատճառաբանելով, որ ամեն օր հրապարակում մշակութային միջոցառումներ ունեն: «Հենց այս պահին հրապարակում մագնիտոֆոն են միացրել ու իրենց այդ միջոցառման միակ ունկնդիրը տարեց մի տատիկ է: Բոլոր կադրերը ֆիքսված են»,- ասաել է Նաիրա Զոհրաբյանը:

Ինչևէ, արարատցիները այս ընտրությունների ելքը դժվարանում են կանխատեսել, որովհետև երկու կողմի համար էլ ընտրությունները պատվի հարց են դարձել, ընդ որում, երկու թեկնածուները, մեծ հաշվով, կատարում են «թնդանոթի մսի» դեր և պրոցեսների վրա էական ազդեցություն չունեն: Երկու քաղաքական ուժերի ղեկավարներ սեփական ամբիցիաները ցուցադրելու խնդիր ունեն և միջոցների առաջ խտրականություն չեն դնում: Կրկին սկսել են հիշել միմյանց թերությունները, երկրի վատ վիճակը, կառավարության ապաշնորհ քաղաքականությունը: Այս ընտրություններով խաթարվել է իշխանության և այլընտրանքի խաղաղ, համահունչ գոյակցությունը:

Սակայն արարատյան «փոխհրաձգությունները» ինձ մի հետաքրքիր իրավիճակ են հիշեցնում:

Նկատել եք, որ որևէ մարդաշատ վայրում կայանված տաքսիների վարորդները կարող են իրարից ուղևոր փախցնելու համար իրար հետ վիճել, քաշքշել, խռովել, սակայն ուղևոր չեղած կամ ուղերթից վերադարձած ժամանակ գոյակցում են խաղաղ, ուս ուսի, ախպերավարի...

Մեր քաղաքական ուժերից այս երկուսի վարքագիծը շատ նման է այդ տաքսիստների վարքագծին՝ ընտրությունների ժամանակ «ուղևոր», այս դեպքում ընտրող փախցնելու համար չոքում են իրար բկի, կսմթում, միմյանց ռմբահարում, սակայն ընտրություններից հետո նախկինում միմյանց գրեթե գենետիկ անհամատեղելիության հավաստիացումներ տված քաղաքական ուժերը իրենց տարբեր գվարդիականներով հանդերձ շարունակում են խաղաղ գոյակցել՝ ասես ոչինչ էլ չի եղել...

Հետընտրական շրջաններում չգիտես ինչու նվազում են բարձրաձայնվող թերացումների և ապօրինությունների թիվը...

Կամ մշտապես եղեք կոռեկտ միմյանց նկատմամբ, կամ էլ գտեք միմյանցից «պասաժիր» փախցնելու առավել քաղաքակիրթ բառապաշար...

Ի վերջո, համարյա նույն «սերվիսի» վարորդներ եք...

Վարուժան Բաբաջանյան