Զարգանում է աղետների բժշկությունը

Նոյեմբերի 1-ին, ժամը 12.00-ին Գեղարքունիքի մարզի Մարտունի քաղաքում տեղի ունեցավ «Արձագանք. Բժշկական ստորաբաժանումներ. Հայաստանում ապակենտրոնացված արձագանքման կարողությունների հզորացում» ծրագրի շրջանակներում ստեղծված բժշկական ստորաբաժանումների միջև մրցութային ավարտական միջոցառումը:

Ծրագիրն իրականացվում է Շվեյցարիայի Զարգացման և համագործակցության գործակալության ( SDCA) ֆինանսական աջակցությամբ և ՀՀ Արտակարգ իրավիճակների նախարարության հետ համագործակցությամբ:

Միջոցառմանը ներկա էին ՀՀ ԱԻ նախարար Արմեն Երիցյանը, Հայաստանում Շվեյցարիայի դեսպան Լուկաս Գասերը, Գեղարքունիքի փոխմարզպետ Անդրանիկ Հակոբյանը և այլ հյուրեր:

Ըստ վարժանքի սցենարի` նոյեմբերի 1-ին, ժամը 09.27-ին Գեղարքունիքի մարզում տեղի է ունեցել երկրաշարժ' 3,5 մագնիտուդ ուժգնությամբ, ստորգետնյա ցնցումները գրանցվել են Վերին Գետաշեն գյուղից 2 կմ հեռավորության վրա, հիպոկենտրոնը գտնվել է 16 կմ խորության վրա:

Նույն օրը` ժամը 12.10-ին ՀՀ ԱԻՆ Փրկարար ծառայության Ճգնաժամային կառավարման կենտրոնում ահազանգ է ստացվել, որ Մարտունու Լճափի 999 հասցեում երկրաշարժի հետևանքով փլուզվել է բնակելի տուն, որը ուղեկցվել է գազի արտահոսքից առաջացած պայթյունով և հրդեհով, կան տուժածներ:

Վարժանքին մասնակցում էին Մարտունու և Վանաձորի բուժմիավորումները և փրկարարները:

Փրկարարների կողմից կատարվեց տարածքի հետախուզում, հայտնաբերված տուժածներին բժիշկները տեղում ցուցաբերեցին առաջին բուժօգնություն և տեղափոխեցին տեսակավորման կետեր: Դիտորդները'Երևանի պետական բժշկական համալսարանի շտապօգնության ամբիոնի դասախոսները, վերլուծեցին թիմերի կատարած աշխատանքի արդյունքները, ամփոփեցին կազմակերպչական և մասնագիտական մոտեցումները, համաձայն որոնց հաղթող ճանաչվեց Մարտունու թիմը:

Հայաստանում Շվեյցարիայի դեսպան Լ. Գասերը պարգևատրեց հաղթող թիմին, իսկ նախարար Ա. Երիցյանն էլ պարգևատրեց վարժանքին մասնակից մի շարք անձանց` դասախոսներ, բժշկական անձնակազմի ներկայացուցիչներ, Տավուշի մարզպետարանի աշխատակիցներ, SDC ծրագրի պատասխանատուներ, ինչպես նաև Տավուշի մարզային փրկարարական վարչության պետ Վ. Հովսեփյանին:

Վարժանքը նպատակ էր հետապնդում կատարելագործել փրկարարական և բժշկական ստորաբաժանումների համագործակցությունը` Հայաստանում ՄԱԿ-ի որոնողափրկարարական միջազգային խորհրդատվական խմբի (INSARAG) չափանիշներին համապատասխան փրկարարական կառույց ունենալու համար: