Լարված իրավիճակ Սայաթ-Նովա 10/5 հասցեում

Այս պահին «ԼԱՐԿՈ Գրուպ» ՍՊԸ-ն Սայաթ-Նովա 10/5 հասցեում փորձում է սկսել կառուցապատման աշխատանքները: Նախատեսվում է կառուցել հինգհարկանի բազմաֆունկցիոնալ շենք, և դա առաջացրել է հարակից շենքերի բնակիչների զայրույթը: Այնտեղ է նաև «Ժառանգություն» կուսակցության անդամ Ստյոպա Սաֆարյանը:

Այս պահին տարածքը հսկվում է ոստիկանության կողմից: Բնակիչներն ամեն կերպ փորձում են պաշտպանել իրենց բակը` սպասելով քաղաքապետարանի ներկայացուցչին:

Հիշեցնենք, որ «ԼԱՐԿՈ գրուպ» ՍՊԸ-ն մասնավոր անձից ձեռք է բերել հողամաս` կաթսայատնով: Երևան քաղաքի գլխավոր ճարտարապետի աշխատակազմից ավելի վաղ տեղեկացրել էին, որ Սայաթ-Նովա 10/5 հասցեում նախատեսվող շինության կառուցման համար առկա է Երևանի քաղաքապետարանի կողմից համաձայնեցված հ. 01/18-05/2-40225-640 նախագիծը և կառուցապատող «Լարկո գրուպ» ՍՊԸ-ին տրված` հ. 01/18-40225-683 շինարարության թույլտվությունը:

Միաժամանակ տեղեկացրել էին, որ վերը նշված նախագիծն անցել է կրկնակի փորձաքննություն, որի հիման վրա տրվել է մասնագիտական դրական եզրակացություն: