«Ատրճանակը մեքենայից հանեց, ցուցադրական «զարիժատ» արեց, պահեց մարդկանց վրա ու գոռաց՝ «սաղիդ կկրակեմ, արա´»

Երևանի Թումանյան-Սարյան խաչմերուկի մոտ գտնվող «90's Cafe-Pub»-ում հաճախորդներից երկուսի միջև շարքային վիճաբանություն է տեղի ունեցել և վիճաբանողներն իրենց ծանոթների հետ դուրս են եկել «փիաբից» ՝ հարաբերությունները դրսում պարզելու համար:

Երբ վիճաբանությունն առանց լուրջ հետևանքների ավարտին է մոտենալիս եղել, «փաբից» դուրս է եկել մի անձնավորություն, մոտեցել փողոցում կայանված սև «Հունդայի էլանտրա» 80 ԼԼ 909 համարանիշի ավտոմեքենային, ներսից հանել ատրճանակը և պահել հավաքված տասնյակ երիտասարդների ուղղությամբ:

Ականատեսներից մեկը պատմել է հետևյալը. «Ատրճանակը մեքենայից հանեց, ցուցադրական «զարիժատ» արեց, պահեց մարդկանց վրա ու ընդգծված լկտի տոնով գոռաց՝ «սաղիդ կկրակեմ, արա», ու ամենավերջին հայհոյանքները սկսեց տեղալ՝ չնայած հավաքվածների մեջ շատ էին աղջիկները»:

Ականատեսի պնդմամբ, այդ պահին նրան են մոտեցել մոտերքում հերթապահող «կարմիրբերետավորները», նրանից վերցրել են զենքն ու մի կողմ տարել: Սակայն, անմիջապես ետ են վերադարձրել զենքը: Դրանից հետո «կրակողը» մտել է «փաբ», հաշիվը փակել ու հեռացել: Ականատեսները ճանաչել են տվյալ անձնավորությանը և թերթի թղթակցին հայտնել, որ նա ոստիկանության աշխատակից է՝ քրեական վարչությունից, սակայն անուն-ազգանունը չգիտեին:

Թերթին հաջողվել է պարզել նշված ավտոմեքենայի սեփականատիրոջ անուն-ազգանունը՝ Հովհաննես Բալյան:

-80 ԼԼ 909 պետհամարանիշի Հունդայի էլանտրա ավտոմեքենան ձե՞զ է պատկանում:

-էտի մեզ ա պատկանում, մեր վարորդն ա քշում, ի՞նչ ա պատահել:

-Ձեր մեքենան տեսել են շաբաթ օրը գիշերը, Թումանյան-Սարյան խաչմերուկում գտնվող «90՚տ Cafe-Pub»-ի մոտ: Դուք ե՞ք վարել այդ օրը այդ ժամին:

-Վարորդն ա վարում, ճիշտն ասած, իրա քայլերով չեմ հետաքրքրվում էլի ազիզ ջան:

-Իսկ կարո՞ղ եք ձեր վարորդի անունն ասել:

-Ես կարող եմ ընդհանրապես ձեր հետ չխոսել:

-Տեղյակ ե՞ք, որ ձեր վարորդն այդ օրը վիճաբանության մեջ է եղել:

-Կարող ա խառնում եք:

-Ինչը՞:

-Մեքենայի համարները կարող ա խառնում եք:

-80 ԼԼ 909 պետհամարանիշը չէ՞:

-Այո, այո:

-Ձեր վարորդի մոտ հաճա՞խ է ատրճանակ լինում:

-Իրա մոտ ամեն ինչ էլ լինում ա:

-Իսկ օրինակա՞ն է այդ ամեն ինչը լինում:

-Այո. օրինական: Դու հիմա զանգել ես զապիս ես անում, ի՞նչ ա քո ուզածը: Եթե ինչ-որ բան ա կատարվել, դիմեք ոստիկանություն: Ես վարորդի քայլերին չեմ հետևում, ես ուզում եմ իմանամ, ինչ եք դրանից հետո հարցնում:

-Իսկ դուք որտե՞ղ եք աշխատում:

-Բավարարված ե՞ք պատասխանից, իմ պատասխանով բավարարված ե՞ք: Հետո կզրուցենք հիմա հարմար չի:

Մանրամասները՝ կարդացեք «Հայկական ժամանակ» օրաթերթի այսօրվա համարում: