Վարդան Մինասյանը կարող է գլխավորել գերմանական ակումբ

Երեւան: Մեդիամաքս: Հայաստանի ֆուտբոլի ազգային հավաքականի նախկին գլխավոր մարզիչ Վարդան Մինասյանը կարող է գլխավորել գերմանական, չեխական, ռուսական կամ էլ ուկրաինական ակումբ:

Այս մասին Մեդիամաքս-ի հետ զրույցում ասել է մարզչի գործակալ, Sport Talent Agency գործակալության տնօրեն Արկադի Վասիլյանը:

«Մենք բանակցություններ ենք վարում նաեւ ասիական, արաբական եւ եվրոպական այլ երկրների ակումբների հետ: Առայժմ ոչինչ հստակ չէ, միայն կարող եմ ասել, որ Մինասյանի նկատմամբ հետաքրքրությունը մեծ է»,- նշել է Վասիլյանը:Գործակալն ընդգծել է, որ իրենք չեն շտապում, մանրամասն քննարկելու են բոլոր առաջարկները, նոր միայն որոշում կայացնելու:

«Վարդան Մինասյանը Եվրոպայում հայտնի մասնագետ է, ու շատերն են հիացած նրա մարզչական կարողություններով: Նա կարող է մարզել ցանկացած բարձրակարգ թիմ», - նշել է գործակալը:

Վասիլյանի խոսքով, Մինասյանի կարեւոր պահանջներն այն են, որ ակումբը հանդես գա բարձրագույն խմբում ու հաճախակի հանդիպումներ անցկացնի: