Ընդունվեց Սոչիի օլիմպիական խաղերին նվիրված հաշտության բանաձևը

ՄԱԿ –ի նյույորքյան շտաբ – բնակարանում նոյեմբերի 6 –ի երեկոյան տեղի ունեցավ կազմակերպության թվով 68 –րդ գլխավոր համաժողովը: Օրակարգի հիմնական թեման Սոչիի ձմեռային օլիմպիական խաղերին նվիրված հաշտության բանաձևի ընդունումն էր, ըստ որի համաշխարհային գլխավոր մարզահանդեսից յոթ օր առաջ և հետո աշխարհում պետք է թևածի խաղաղությունը:

Ռուսական և հունական կողմերն են պատրաստել փաստաթուղթը, որին համահեղինակ է դարձել 70 երկիր. տեղեկացնում է ՀԱՕԿ-ի պաշտոնական կայքը:

Հաշտության կնքման ավանդույթը բխում է դարերի խորքից: Դեռևս հին Հունաստանում, խաղերի անցկացման ժամանակ, մասնակից երկրների ներկայացուցիչներին հնարավորություն է տրվել մրցավայր գալ ու վերադառնալ անվտանգ: Բարի ավանդույթը ՄՕԿ –ը վերականգնեց 1992 թ.: Մեկ տարի անց այն ստացավ ՄԱԿ – ի /Միավորված ազգերի կազմակերպություն/ աջակցությունը:

Երկու տարին մեկ անգամ, ձմեռային և ամառային օլիմպիական խաղերից առաջ, կազմակերպիչ երկիրը ներկայացնում է բանաձևի իր տեքստը, որն ընդհանրապես բովանդակում է սպորտի միջոցով մոլորակի վրա երջանիկ կյանքի հաստատումը, օլիմպիական գաղափարների տարածումը և խաղաղության ամրապնդումը:

«Սոչի – 2014 –ի » կազմկոմիտեի նախագահ Դմիտրի Չեռնիշենկոն իր ելույթում ասաց, որ խաղերի մեկնարկին մնացել է 92 օր: Ռուսաստանը սիրով կընդունի բոլոր հյուրերին և մասնակիցներին: Հեղինակավոր մարզիկներն ու մասնագետները հատուկ պատրաստված հաշտության պատերի վրա կարող են գրել խաղաղության մասին իրենց ցանկությունները:

ՄՕԿ –ի նորընտիր նախագահ Թոմաս Բախն իր հերթին ասաց, որ միջազգային օլիմպիական կոմիտեն դեմ է բոյկոտի բոլոր կոչերին: Դրանք հակասում են սպորտի բարոյական ոգուն, աշխարհի խաղաղությանը, մարդկության համերաշխությանը և մարզական համագործակցությանը:

Նյու Յորքում ընդունված հաշտության բանաձևը հոբելյանական է` 10 –րդը: