Տեղի ունեցավ «Քայլ առաջ» գրքի շնորհանդեսը

Նոյեմբերի 8-ին` ժամը 18:00-ին, «Բյուրոկրատ» գրախանութում տեղի ունեցավ բանաստեղծուհի Նանա Մարգարյանի «Քայլ առաջ» բանաստեղծությունների ժողովածուի շնորհանդեսը:

«Քայլ առաջ» ժողովածուն, որը այսօր ներկայացվեց ընթերցողի ուշադրությանը, բանաստեղծուհու առաջին փորձն է գրական ոլորտում: Պոեզիայի ժողովածուն ընդգրկում է Նանա Մարգարյանի վաթսունից ավել բանաստեղծությունները հայերեն և ռուսերեն լեզուներով:

Շնորհանդեսին ներկա էին բանաստեղծուհու մտերիմներն ու ընկերները, ընթացասերներ ու ԶԼՄ-ների ներկայացուցիչներ, ինչպես նաև հանրահայտ Ժամանակակից բանաստեղծուհի, մի շարք ստեղծագործությունների հեղինակ («Ետնադուռ» (2011), «Նշխար» (2001), «Շնչառություն» (1996), «Երկնաքար» (1990)) Ազնիվ Սահակյանը, ով իր մասնագիտական խորհուրդներով աջակցել և ոգեշնչել է Նանա Մարգարյանին:

Շնորհանդեսի ընթացքում Նանա Մարգարյանը ընթերցեց իր «Քայլ առաջ» պոեզիայի ժողովածուի մեջ ընդգրկված բանաստեղծություններից մի քանիսը, ինչպես նաև պատասխանեց ընթերցասերների հարցերին՝ ուղղված ստեղծագործական կենսագրության նկարագրմանը և հետագա ծրագրերին: Շնորհանդեսի ներկաները նաև քննարկեցին ժամանակակից պոեզիայի դերն ու նշանակությունը մերօրյա հասարակությունում:

Պատասխանելով ներկաների հարցերին, Նանա Մարգարյանը նշեց, որ իր բանաստեղծություններից յուրաքանչյուրը անկեղծ պատմություն է, որի ամեն մի բառն արտահայտում է իր կողմից վերապրած հույզեր ու հույսեր:

«Այս բանաստեղծությունները նվիրում են Կնոջն ու իրեն ի վերուստ տրված արարող սիրո ուժին: Դրանք սեփական ապրումներին անդրադարձի միջոցով սիրո ու կյանքի հավերժական առեղծվածը հասկանալու փորձ են»,- նշեց բանաստեղծուհին:

Շնորհանդեսին հաջորդեց տոնական հյուրասիրություն, որի ընթացքում հյուրերը անմիջական և ջերմ մթնոլորտում հնարավորություն ունեցան շփվելու բանաստեղծուհու հետ:

Նանա Մարգարյանը ծնվել է 1978 թվականին, Երևանում: Մասնագիտությամբ երաժիշտ է: Ավարտել է Ռոմանոս Մելիքյանի անվան երաժշտական ուսումնարանի դաշնամուրային բաժինը, իսկ հետագայում նաև' Երևանի Կոմիտասի անվան պետական կոնսերվատորիայի վոկալ արվեստի բաժինը: