Տեղ թողե՛ք. hորդոր մամուլի խոսնակներին

«Հրապարակ» օրաթերթի գլխավոր խմբագիր Արմինե Օհանյանն այսօրվա խմբագրականում գրում է.

Անցած շաբաթ մենք մոտ տասի չափ պաշտոնական պատասխաններ ենք ստացել: Ըստ էության չկա գերատեսչություն, որ չարձագանքի իրեն վերաբերող հրապարակումներին: Մի կողմից՝ դա չի կարող չուրախացնել մեզ. Կնշանակի՝ մեր գրածն անհետևանք չի անցնում, մեզ ոչ միայն կարդում են, այլև փորձում են արդարանալ, հերքել, պարզաբանել, ներկայացնել իրենց արածը: Բայց այդ պաշտոնական պատասխաններին ծանոթանալուց հետո, թող անհամեստ չհնչի, մամուլի խոսնակների դպրոց բացելու, լիկբեզ անցկացնելու ցանկություն է առաջանում:

Ուզում եմ խորհուրդ տալ մեր գործընկերներին (եթե, իհարկե, մամլո խոսնակներն ու լրագրողները գործընկերներ են), հարգելիներս, մի հերքեք անհերքելին, մի ստիպեք, որ մենք պատասխանենք ձեզ, նոր փաստեր ներկայացնենք, ցույց տանք ձեր անտեղյակությունը կամ հանրությանն ապակողմնորոշելու ծառայողական ջանքերը: Երբ ձեր պատասխանի մեջ հաստատում եք մեր նշած փաստերը և առարկում մեր որակումների ու գնահատականների դեմ, մի օգտագործեք «ապատեղեկատվություն», «փաստերի խեղաթյուրում» և այլ կտրուկ արտահայտություններ, քանզի դա խոսում է այն մասին, որ դուք կամ չեք ընկալում այդ արտահայտությունների բուն իմաստը, կամ տպավորություն թողնելու համար ինքներդ եք «ապատեղեկատվություն» տարածում: Եթե առարկություններ ունեք որևէ հոդվածի կամ լուրի մի մասի, մեկ արտահայտության հետ կապված, մատնանշեք կոնկրետ այդ հատվածը, այլ ոչ թե հայհոյեք ամբողջ հոդվածը: Եվ վերջապես, պատասխան տեքստերի մեջ ձեր, սիրտն ու հոգին մի դրեք և ձեզ մի նույնացրեք ձեր «շեֆի» հետ. դուք այսօր պաշտոն եք զբաղեցնում, վաղը կարող եք զրկվել դրանից և համալրել մեր՝ շարքային լրագրողներիս շարքերը կամ դիմել մեզ, որ պաշտպանենք ձեր ոտնահարված իրավունքները: Տեղ թողեք: