«Այսօր սև եղեռնը, դառնալով սպիտակ, էությամբ նույն հայաթափումն է». Զարուհի Փոստանջյան (տեսանյութ)

«Ժառանգություն» խմբակցության պատգամավոր Զարուհի Փոստանջյանի հայտարարությունը Հ1 հեռուստաընկերության «Խորհրդարանական շաբաթ» հաղորդման շրջանակում.

«20-րդ դարում մեր ժողովրդի հետ տեղի ունեցած աղետը Հայոց Արևմուտքում, մեր Հայրենիքի մեծ մասի և միլիոնավոր հարազատների կորուստը նորովի կրկնելը 21-րդ դարի սկզբին մեզ չի ներվելու:

Այսօր սև եղեռնը, դառնալով սպիտակ, էությամբ նույն հայաթափումն է, այժմ էլ` Հայոց Արևելքից, այն էլ` անկախ, ինքնիշխան: Եվ եթե մեր պատմության դասերը` դիմադրելով փրկվել, հաղթելու էջերը մոռացել ենք, ապա վերհիշենք:

1918-ին դիմադրելով հաղթեցինք Սարդարապատում և վերակերտեցինք Հայոց կորսված պետականությունը:

1988-ից դիմադրելով հաղթեցինք Արցախյան ճակատում և ապացուցեցինք, որ հնարավոր է վերադարձնել կորցրած հողերը:

Հայոց էպոսի մեր սիրելի հերոսներից «ծուռ» Դավիթը անվախ դիմադրությամբ հաղթեց բռնակալին' փրկելով հայրենի եզերքը նվաճումից և անպատվությունից:

Խենթավուն, քաջ և իմաստուն` այս տեսակի հայի կերպարը պարտավոր ենք արթնացնել մեր մեջ:

Հազարամյակների ընթացքում կուտակված բարի, արդարամիտ, արժեքակերտ, ինքնությունը պահող ու նաև մարտնչող մեր Դավթի (խտացված հայի) ահռելի ուժն ի ցույց դնենք և գործադրենք այսօր, քանի որ կրկին եկել է ժամը դիմադրելու և հաղթելու: Այս անգամ գլխավոր ճակատը սահմանը չէ: Այսօր գլխավոր ճակատը մեր ներսում է, իսկ թշնամին` մեր մեջ:

Մեր արյունաքամ հայրենիքի ազատության համար ճակատը անհապաղ պահանջում է ժողովրդի համախմբում և զանգվածային դիմադրություն:

Մենք ճանաչում ենք բռնազավթիչներին, մենք գիտենք մեր ներսում ապրող և ավերող գիշատիչներին: Սակայն մոռացել ենք մեր հերոսներին, նրանց կողմից կյանքի կոչված ցասման ու վրեժի քաջագործությունները: Յուրաքանչյուրս մեր մեջ կրում ենք հայրենասեր հերոսների գեները, որոնց վերջնական ժայթքումը արձանագրելու է մոտալուտ հաղթանակի փաստը:

2013 թվական՝ դիմադրության և հաղթանակի մեկնարկ. փետրվարի 18 - նախագահական ընտրություններում մերժում գիշատչին, ապրիլի 9 - Ազատության հրապարակում ազատության, արդարության և միասնության համազգային երդում, հուլիսի 25 - ուղեվարձի ապօրինի թանկացման դադարեցում, սեպտեմբերի 20 -ընդվզում Մաքսային միությանը միանալու հայտարարության դեմ և հաղթական դիմադրության անձնազոհ մարտնչման բազմաթիվ այլ օրինակներ:

«Ասացեք, եղբարք հայեր, ի՞նչ անենք – հիմի է՞լ լըռենք… Մեր սուրբ, քաջ նախնյաց գործերը գիտենք – մինչև ե°րբ լըռենք…» Մեզ նաև այսպիսի պատգամ թողեց Ռաֆայել Պատկանյանը: Ուրեմն' չենք լռելու և չենք հանդուրժելու, ուրեմն' պատերազմ վախկոտությանը և անտարբերությանը, հետևաբար` մարտնչում ենք և հաղթում»:

ՀՀ ԱԺ «Ժառանգություն» խմբակցության լրատվական ծառայություն