Վազգեն Խաչիկյանին պետք է սարքել թանգարանային էքսպոնատ. Նաիրա Զոհրաբյան

Ազգային ժողովն այսօր սկսեց քառօրյա նիստերի աշխատանքները: Քննարկման դրվեց Վերահսկիչ պալատի նախագահի նշանակման հարցը: 

Հիշեցնենք, որ Սերժ Սարգսյանը ՎՊ նախագահի պաշտոնում առաջադրել է Իշխան Զաքարյանի թեկնածությունը:

Իշխան Զաքարյանին հարցով դիմեց ԱԺ ԲՀԿ խմբակցության քարտուղար Նաիրա Զոհրաբյանը:

«Ակնհայտ է, որ ինչ բացահայտում էլ անի Վերահսկիչ պալատը, և այս ամբիոնից աղմկահարույց բացահայտումներ են հնչել, այդուհանդերձ, ինչ-որ մի օղակում այդ ամենն ընդհանտվում է: Տպավորությունն այնպիսինն է, որ խոսվում է, ասվում է, և պատասխանատվության ենթարկվում են կատարողները: Հիմա դուք էլի օրինակ կբերեք Վազգեն Խաչիկյանին։ Իմ տպավորությամբ` Վազգեն Խաչիկյանին պետք է սարքել թանգարանային էքսպոնատ, անընդհատ օրինակ է բերվում։ Եկե'ք թողնենք Խաչիկյանին, կմնա նա թանգարանային էքսպոնատ` որպես եզակի նմուշ: Այդուհանդերձ, ի՞նչ գործիքներ են պակասում ՎՊ-ին, որ կարողանա գործընթացը հասցնել մինչև վերջ»,-հարցրեց Զոհրաբյանը:

Վերջինիս ի պատասխան` Իշխան Զաքարյանն ասաց.

«ՎՊ-ն, ինտոսայի սկզբունքներին համապատասխան, պետք է այսուհետ կարողանա այդ ստանդարտներով իր հաշվետվությունը ներկայացնել: Դրանք ենթադրում են երեք շատ կարևոր օղակ, առաջինը՝ ՎՊ-ի բացահայտումներ են, երկրորդը՝ այլ բացատրությունները, մեկնաբանությունները, որ տրվում են ՎՊ-ի բացահայտումներից կամ ստուգումներից հետո։ Դրանք կարող են ընդունվել և չընդունվել ՎՊ-ի կողմից, և օրենքը հստակ ասում է` եթե ընդունվում են, բնականաբար, ընդունվում են, եթե ոչ, միակ ճանապարհը դատական իշխանությանը դիմելն է, բայց հիմա մենք ևս մեկ մոտեցում ենք ուզում անել և այս պահին աշխատում ենք այդ ուղղությամբ։ Դա հետևյալն է` կա ՎՊ-ի որոշակի բացահայտում, կամ որոշակի գնահատական` ինչ-որ ծրագրի հետ կապված, կա բացատրությունը կառավարության կողմից, դրանից հետո կա ևս երրորդ պահը՝ ՎՊ-ն ընդունում է որոշակի մեկնաբանություններ։ Եթե հիմա չի ընդունում այդ մեկնաբանությունները, ի՞նչ պետք է լինի հետո։ Հետո, նորից եմ կրկնում, կա մեկ ճանապարհ, դա դատական իշխանություններին դիմելն է: Այս ճանապարհն է ուղղակի նոր մոտեցում, կամ նոր ճանապարհ, ցավոք սրտի, մենք այս պահին առաջարկել չենք կարող, որովհետև դա ամբողջ աշխարհում ընդունված ձև է,-ասաց Իշխան Զաքարյանը: