ԱՄՆ պաշտպանության համագործակցության գրասենյակի ղեկավարն ԱԻՆ-ում

Նոյեմբերի 12-ին ԱԻ նախարար Արմեն Երիցյանն ընդունել է ՀՀ-ում ԱՄՆ պաշտպանության համագործակցության գրասենյակի նորանշանակ ղեկավար Աարոն Քամինգսին։

Հանդիպման հիմնական նպատակն էր քննարկել երկկողմանի համագործակցության ուղիները և հնարավոր նոր ոլորտները։

Նախարար Երիցյանը, շնորհավորելով պարոն Քամինգսին նշանակման կապակցությամբ, ներկայացրեց նախարարության կառուցվածքը և գործունեության հիմնական ուղղությունները։ - Մենք արդյունավետ համագործակցում ենք ԱՄՆ-ի հետ։ ԱԻՆ Ճգնաժամային կառավարման կենտրոնի և 911 ծառայության մի խումբ աշխատակիցներ վերապատրաստում են անցել ամերիկյան համապատասխան կառույցներում, - նշեց ԱԻ նախարարը, - համոզված եմ, որ մեր համագործակցությունն էլ ավելի կսերտանա' ընդգրկելով նոր ոլորտներ, մասնավորապես' սեսյմիկ պաշտպանություն, հրշեջ-փրկարարական ծառայություն, ճգնաժամային կառավարման կենտրոն և այլն։

Աարոն Քամինգսը, շնորհակալություն հայտնելով հանդիպումը կազմակերպելու համար, ներկայացրեց հետագա համագործակցության իր տեսլականը։ - Համոզված եմ, որ ԱԻՆ-ը կարող է արդյունավետ համագործակցել ԱՄՆ արտակարգ իրավիճակների կառավարման դաշնային գործակալության` FEMA-ի հետ, ինչպես նաև շարունակել համագործակցությունը Կանզասի ազգային գվարդիայի հետ, - ավելացրեց Աարոն Քամինգսը։

ԱՄՆ պաշտպանության համագործակցության գրասենյակի ղեկավարն այցելեց ԱԻՆ ճգնաժամային կառավարման կենտրոն և 911 ծառայություն, ծանոթացավ դրանց տեխնիկական հնարավորություններին և աշխատանքային պայմաններին։