Մեր սիրելի Մարկի հիշատակին...

Մեկնարկել է KBH-ի դպրոցական լիգայի երկրորդ խաղաշրջանը: Պրոդյուսերը և դպրոցական լիգայի հիմնադիրը երկրորդ խաղաշրջանը նվիրել են Մարկ Սաղաթելյանի հիշատակին. նա եղել է ոչ միայն իրենց ավագ ընկերը, այլ նաև KBH-ի մեծ նվիրյալ: 

«Եթե KBH-ը համարենք խաղ, ապա մեր սիրելի Մարկը մեծ խաղացող էր և, կարծում եմ, մարդ, ում լիգայում հանդես եկող դպրոցականների համար նա մեծ օրինակ է թե’ որպես մեծ հայ, և թե’ որպես մեծ հումորիստ: Վստահ եմ` տարեցտարի դպրոցականների հումորային մակարդակը գնալով պիտի զարգանա, և, հետևաբար, թիմերի միջև մրցակցությունը նույնպես: Առաջին խաղաշրջանը ապացուցեց, որ KBH-ը կա ու կլինի Հայաստանում: Վստահ եմ, որ այսօր, ջրելով ծառի արմատները, վաղը շատ համեղ պտուղներ կունենանք»,- Lurer.com-ի թղթակցի հետ զրույցում ասաց KBH-ի դպրոցական լիգայի պրոդյուսեր Նարեկ Արշակյանը: Նրա խոսքով` թիմը, որը զբաղվում է ՈՒՀԱ-ի դպրոցական լիգայով, իր առաջ հստակ խնդիր է դրել բարձրացնել ՈՒՀԱ-ի մակարդակը Հայաստանում, և այդ դժվարին գործը սկսեցին հենց դպրոցական լիգայի հիմնումով:

Թիմը բաղկացած է նախկին ուսանողական լիգայում խաղացած փորձառու «խաղացողներից», որոնք հասցրել են խաղալ ոչ միայն Հայաստանում, այլ նաև Սոչի քաղաքում` ամենամյա KBH-ի փառատոնի շրջանակներում,` ստանալով բազմաթիվ հրավերներ ռուսական հեղինակավոր լիգաների կողմից:

Խոսելով երիտասրադության ներգրավվածության և պոտենցիալի մասին` Նարեկ Արշակյանը ասաց.

«Այսօր արդեն ակնհայտ է, որ աստիճանաբար հանրությունը դառնում է ավելի քմահաճ, հասարակությունը դառնում է ավելի պահանջկոտ, և մի քանի տարի հետո արդեն լուրջ պահանջարկ կլինի նոր հումորային մատուցման տեսակներ մտածելու: Այս նախագիծը կնպաստի նոր տաղանդավոր երիտասարդների ի հայտ բերելուն»:

Նշենք նաև, որ Հայաստանի KBH-ի Դպրոցական լիգան ունի նաև ամառային և ձմեռային գավաթի խաղարկություն, որը տեղի է ունենում Ծաղկաձոր քաղաքում` Հայաստանի Երիտասարդական Հիմնադրամի աջակցությամբ:

Լիգայի խմբագիրներն են Արսեն Հարությունյանը, Վահե Խաչատրյանը, Արամայիս Գևորգյանը, Գուրգեն Մնացականյանը, հիմնադիրն է Արամ Մելիքյանը, պրոդյուսերը` Նարեկ Արշակյանը: