«Ռաբիսի թագուհի» Նանան՝ իր ամուսնության, Մոսկվայում գնած բնակարանի և գտնվելու վայրի մասին. բացառիկ հարցազրույց

Վերջերս երգչուհի Նանան սոցիալական կայքերից մեկում տեղադրեց հարսանյաց զգեստով ֆոտոշարք, ինչը շատերին տեղիք տվեց մտածելու, որ «ռաբիսի թագուհին» ամուսնացել է: Եվ ահա, երկար ժամանակ է` երգչուհին չի երևում հայկական երեկույթների և այլ միջոցառումների ժամանակ: Իսկապես Նանան ամուսնացե՞լ է, որտե՞ղ է բնակվում այժմ. այս և այլ հարցերի վերաբերյալ MediaMall.am-ի թղթակիցը զրուցեց երգչուհու հետ:

-Երկար ժամանակ է, ինչ բացակայում եք Հայաստանից: Որտե՞ղ էիք և ինչո՞վ էիք զբաղվում:

- Վերջին շրջանում գտնվում էի ՌԴ-ում, որտեղ մասնակցեցի բազմաթիվ համերգային ծրագրերի և կոմերցիոն միջոցառումների: Այնտեղ էի հիմնականում համերգներ տալու նպատակով:

- Վերջերս շրջանառված լուրերի համաձայն` դուք ամուսնացել եք: Ո՞վ է Ձեր ընտրյալը:

- Ես չեմ ամուսնացել, պարզապես նոր ֆոտոշարք եմ պատրաստել հայտնի ամսագրերից մեկի համար: Նրանք առաջարկեցին, ես էլ չմերժեցի: Հարսանյաց զգեստով ֆոտոշարք անելը չի նշանակում ամուսնանալ:

-Ամուսնության և առհասարակ սիրո մեջ սոցիալական կարգավիճակը կարևորու՞մ եք:

-Ես կարևորում եմ ներքին և մարդկային արժեքները, իսկ մնացածը համարում եմ երկրորդական:

-Որտե՞ղ եք բնակվում` Հայաստանո՞ւմ, թե՞…

-Ե՛վ Երևանում ունեմ բնակարան, և՛ Մոսկվայում եմ վերջերս ձեռք բերել: Սակայն երբեք չեմ լքի Երևանս:

-Որքա՞ն է պետք վճարել Նանային կոմերցիոն միջոցառումների ժամանակ երգելու համար:

- Կարծում եմ` ճիշտ չի լինի նշել գումարի չափը, սակայն երգում եմ ստանդարտ գներից բարձր:

-Ի՞նչ կարելի է սպասել «ռաբիսի թագուհուց»:

- Թագուհուց սպասեք թագավորական նորություններ. թագուհին ներկայանում է թագուհուն վայել աշխատանքներով:

Զրուցեց Դավիթ Պոլոյանը