Բյուջեն թոփալ և կաղ է. Հրանտ Բագրատյան

Ազգային ժողովում այսօր շարունակվում է Կառավարության կողմից ներկայացված «2014-ի բյուջեի նախագծի» քննարկումը։

«Ժառանգություն» խմբակցության պատգամավոր Ալեքսանդր Արզումանյանի կարծիքով` 2014 թվականի բյուջեն ենթադրական բյուջե է:

Պատգամավորը, հարց ուղղելով ԱԺ ֆինանսավարկային հանձնաժողովի նախագահ, ՀՀԿ-ական պատգամավոր Գագիկ Մինասյանին, ասաց, որ այս բյուջեն գրվել է քաղաքական լրիվ այլ կոնյուկտուրաներում: «Գրվել է այն ժամանակ, երբ Մաքսային միություն մտնելու որոշում դեռ չէր կայացվել, և հետևաբար, հաշվի չեն առնվել մեր եկամուտների առումով ցուցանիշները: ՄՄ մտնելով` մենք այլևս չենք կարողանալու ձեռք բերել այն, ինչ ցանկանում ենք, այլ մեզ դեմ կտան այն, ինչ իրենք են ուզում»,-նշեց Արզումանյանը:

Վերջինիս հետաքրքրվեց. «Ո՞րն է մեր վստահությունը, որ ԵՄ-ից եկող սպասելիքները ամբողջ ծավալով լինելու են 2014-ին, ու սեկվեստոր չի լինելու: Մեկ-երկու ամսվա մեջ ափալ-թափալ փոփոխություններ անելն օրենսդրության մեջ անընդունելի է»:

ՀԱԿ պատգամավոր Հրանտ Բագրատյանը նշեց, որ Գագիկ Մինասյանը կողմ է քվեարկում այս բյուջեին, սակայն այն չունի եկամուտներ. «Ամբողջ բյուջեում ընդամենը 6 տող են եկամուտները, եթե այլ տող կա, եկե'ք ասեք: Դուք մեղավոր եք սրա համար, քանի որ բյուջեն թոփալ է, կաղ է սրանով: Ինչպես կարելի է չունենալ բյուջե և ունենալ ՏԻՄ: Ո՞ւր են բյուջեի եկամուտները»,-ասաց Հրանտ Բագրատյանը:

Գագիկ Մինասյանը պատասխանեց. «Ես չեմ գտել որևէ պրոբլեմ այդ օրենքում: Եթե դուք ունեք խնդիրներ, ապա ես պատրաստ եմ դրանք ձեզ հետ քննարկել»:

Հրանտ Բագրատյանը Մինասյանից շնորհակալություն հայտնեց` ասելով. «Շնորհակալ եմ ձեզ, որ ազնվորեն ասում եք, որ Սահմանդրության համապատասխան կետը չի կատարվում, որի արդյունքում ՏԻՄ-ը բյուջե չունի»:

«Պարո'ն Բագրատյան, դուք ինձ անակնկալի եք բերում. մի՞թե դուք դա եք հասկացել իմ խոսքերից: Իհարկե, Սահմանդրության այդ կետը կատարում ենք»,-պատասխանեց Գագիկ Միանսյանը: