Արմեն Աշոտյանը՝ դպրոցներում դրամահավաքության և հանրակրթական ոլորտում առկա 3 խնդրի մասին

«Հայաստանում մեծ թիվ են կազմում այն դպրոցները, որտեղ աշակերտական համակազմը շատ փոքր է, կրթության կազմակերպման նոր մեթոդների կարիք կա. մենք նման դպրոցներում կրթության կազմակերպման նոր ձևերի կիրառման կարիք ունենք»: Այս մասին այսօր լրագրողների հետ զրույցում ասաց ԿԳ նախարար Արմեն Աշոտյանը:

Վերջինիս խոսքերով՝ նախարարությունը փորձում է զերծ մնալ դպրոցների «խոշորացումից», բայց մեկ կամ հինգ աշակերտի համար դպրոց պահելը դժվար է:

Նախարարը նշեց, որ խնդիրը լուծելու համար անհրաժեշտ է այդ դպրոցներում բացել նախակրթարաններ, փորձել կիրառել տեղեկատվական տեխնոլոգիաների հնարավորությունը, վիրտուալ կամ էլեկտրոնային կրթության հնարավորությունը, որ դասերը լինեն օնլայն և ծախսերի առումով` ավելի մատչելի: «Ոչ բոլոր համայնքներում է դա հաջողվել կամ հաջողվելու, դա բացասական երևույթ է, որի մեղքը մերը չէ»,-ասաց Աշոտյանը:

Երկրորդ խնդիրը, ըստ ԿԳ նախարարի, աշխատուժի ավելցուկն է:

«Պետական բյուջեով որևէ կրճատում կրթության ոլորտի հաստիքների չի կատարվել: Երբ ասում են, որ ուսուցիչները չեն ստանում իրենց միջին աշխատավարձը, պետք է հաշվի առնել, որ քիչ են այն դպրոցները, որտեղ ուսուցիչներն ամբողջական դրույքով են աշխատում: Հիմնական առաքելությունը ոչ թե աշխատատեղ ստեղծելն է, այլ` կրթության որակը»,-ասաց նախարարը:

Վերջինս ներկայացրեց նաև երրորդ խնդիրը, որը դպրոցների շենքերն են. 1 միլիարդ դոլարին համարժեք գումար է հարկավոր դպրոցների վերանորոգման և վերազինման համար: Այդ գումարը, ըստ նախարարի, միայն պետական բյուջեով ապահովել հնարավոր չէ:

Խոսելով դպրոցներում տեղի ունեցող դրամահավաքության մասին` Արմեն Աշոտյանն ասաց, որ ինքը չի եղել որևէ երկրում, որտեղ գումար չի հավաքվում, անգամ` Եվրամիության անդամ երկրներում: «Սակայն դա արվում է շատ ավելի նորմալ ու քաղաքակիրթ եղանակով` ծնողական հանրույթի որոշմամբ. ուրիշ բան, որ Հայաստանում այս պրոցեսը կրում է հրահանգային բնույթ, բայց սա փորք հարց է, և դաշտը կարգավորված է: Ապօրինի դրամահավաքն է արգելված, բայց ոչ թե դրամահավաքը: Այսօր թատրոնների տնօրենները մեզանից դժգոհ են, քանի որ թույլ չենք տալիս, որ դպրոցներում տոմս վաճառվի»,-ասաց Արմեն Աշոտյանը: