Հայ ուսանողները ՄԱԿ-ի պատվիրակների դերում

Հերթական ՄԱԿ-ի մոդել-խորհրդաժողովը միավորել էր հայաստանյան երեք բուհերի ուսանողներին:
ՄԱԿ-ի հայաստանյան գրասենյակում այսօր մեկնարկեց երկօրյա ՄԱԿ-ի մոդել-խորհրդաժողովը, որին մասնակցում են ավելի քան 70 ուսանողներ Երևանի պետական համալսարանից, Վ. Բրյուսովի անվան պետական լեզվաբանական համալսարանից և Հայ-ռուսական (Սլավոնական) համալսարանից: Խորհրդաժողովի կազմակերպիչը ՄԱԿ-ի հայաստանյան գրասենյակի հանրային տեղեկատվության վարչությունն էր, որին մեծապես աջակցել են վերոնշյալ երեք համալսարանները:

«Խորհրդաժողովի մասնակից ուսանողներն արդեն իսկ լավ հասկանում են, թե ինչպիսի մեծ պատասխանատվություն է համապատասխան երկրի դիրքորոշումը ներկայացնելը, պատշաճ կերպով հնչեցնելը, բանակցելը և ընդհանուր եզրեր գտնելը ՄԱԿ-ի անդամ պետությունների հետ՝ հաշվի առնելով հնարավոր հետևանքները ոչ միայն իրենց երկրի և տարածաշրջանի, այլև ամբողջ մոլորակի համար»,- խորհրդաժողովի բացման խոսքում ասաց ՄԱԿ-ի մշտական համակարգողի պաշտոնակատար Հենրիետ Արենսը:

Խորհրդաժողովի բացմանը ներկա էին նաև երեք համալսարանների ղեկավարության ներկայացուցիչները, ովքեր ուրախությամբ նշեցին, որ միջոցառումը հնարավորություն է ընձեռել միևնույն վայրում մեկտեղելու բազմաթիվ երիտասարդների, ովքեր պետք է իրենց ունակություններն ի սպաս դնեն հնարավորինս լավ ներկայանալու և իրենց երկրները լավ ներկայացնելու համար:

«Մայր բուհի ռեկտորատը և ուսանողական կառույցները միշտ բարձր են գնահատում ՄԱԿ-ի հայաստանյան գրասենյակի հետ համագործակցությունը, իսկ նմանօրինակ միջոցառումներն էլ ունեն շատ կարևոր կրթական նշանակություն, թեև անցնում են խաղարկային ձևով: Միայն ուրախ ենք, որ այսքան թվով ուսանողներ են մասնակցում ՄԱԿ-ի մոդել-խորհրդաժողովին»,- իր խոսքում նշեց ԵՊՀ պրոռեկտոր Ռուբեն Մարկոսյանը:

Հավելենք, որ խորհրդաժողովի օրակարգի հարցն է «Իրավիճակը Սիրիայում»: Ուսանողները, ստանձնելով դիվանագետների դերերը, ներկայացնում են իրենց երկրների դիրքորոշումները օրակարգային հարցի վերաբերյալ:

Եթե այսօր զուգահեռ անցկացվող երեք նիստերում ուսանողները աշխատում էին նշված 3 տարբեր կոմիտեներում՝ պատրաստելով երեք առանձին որոշման նախագծեր, ապա երկրորդ օրը ընդհանուր վեհաժողովի լիագումար նիստում միասին կքննարկեն վերջնական բանաձևը: