Ստրասբուրգի քաղաքապետարանի առջև վեց ամիս ծածանվող Հայաստանի դրոշը փոխարինվեց Ավստրիայի դրոշով

Նոյեմբերի 14-ին Հայաստանի ԱԳ նախարար, Եվրոպայի խորհրդի նախարարների կոմիտեի նախագահ Էդվարդ Նալբանդյանի նախագահությամբ տեղի է ունեցել ԵԽ նախարարների կոմիտեի նիստը: Ըստ պաշտոնական հաղորդագրության Է. Նալբանդյանը իր ելույթում ամփոփել է Հայաստանի նախագահության օրոք Եվրոպայի խորհրդի նախարարների կոմիտեի վեցամսյա գործունեությունը:

Էդվարդ Նալբանդյանն ընդգծել է, որ հայկական նախագահության գերակայությունները ինչպես նաեւ նպատակները սահմանվել էին ի պատասխան այն մարտահրավերների, որոնց դիմակայում են Եվրոպայի խորհրդի անդամ պետություններըՙ մարդու իրավունքների պաշտպանության, ժողովրդավարության ամրապնդման եւ իրավունքի գերակայության հաստատման առումով:

Նախարարի բնորոշմամբ հենց այդ նպատակով նախագահության գերակայություններ էին սահմանվել ռասիզմի եւ այլատյացության դեմ պայքարը, միջմշակութային երկխոսության միջոցով եվրոպական արժեքների խթանումը, մարդու իրավունքների եւ իրավունքի գերակայության միջազգային չափանիշների ամրապնդումը, ժողովրդավարական հասարակությունների խթանումը, եվրոպական ճարտարապետությունում ԵԽ դերի ամրապնդումը:

«Մեր նախագահության ընթացքում սերտորեն համագործակցել ենք Եվրոպայի խորհրդի բոլոր կանոնադրական մարմինների հետ, ակտիվ փոխգործակցություն ենք ունեցել գլխավոր քարտուղարի եւ քարտուղարության, Խորհրդարանական վեհաժողովի, Մարդու իրավունքների եվրոպական դատարանի, մարդու իրավունքների հանձնակատարի, Տեղական եւ ռեգիոնալ իշխանությունների կոնգրեսի հետ», ասել է նախարար Նալբանդյանը:

Արտգործնախարարը հիշեցրել է, որ Հայաստանը մեծ կարեւորություն է տվել Եվրոպայի խորհրդում իր նախագահությանը, Հայաստանի նախագահության նախաձեռնությամբ իրականացվել են մի շարք միջոցառումներ, որոնցից ամենանշանակալիներն էին «Պայքար Եվրոպայում խտրականության, այլատյացության եւ անհանդուրժողականության դեմ» բարձրաստիճան խորհրդաժողովը, «Կրոնի ազատությունն աշխարհում այսօր. մարտահրավերներ եւ երաշխիքներ» համաժողովը, «Իրավունքի գերակայության եվրոպական չափորոշիչները եւ իշխանությունների հայեցողության սահմանները Եվրոպայի խորհրդի անդամ երկրներում» խորագրով գիտաժողովը, «Դարձնելով մայրաքաղաքները քաղաքացիներին մոտ. մարտահրավեր հանրային պաշտոնյաների համար» համաժողովը, «Եվրոպական ժառանգության օրեր»-2013 ծրագիրը եւ այլն:

Նախարարական հանդիպման Եվրոպայի խորհրդի նախարարների կոմիտեի նախագահությունը Հայաստանը փոխանցել է Ավստրիային: Այս կապակցությամբ շնորհավորելով Ավստրիայի փոխվարչապետ, եվրոպական եւ միջազգային հարցերի նախարար Միքայել Շպինդելեգերին ՙ նախարար Նալբանդյանը վստահեցրել է, որ Հայաստանն իր աջակցությունը կբերի ավստրիական նախագահությանը:

Հայաստանի նախագահության արդյունավետ եւ ակտիվ գործունեությունն իրենց ելույթներում ընդգծեցին Ավստրիայի, Ռուսաստանի, Միացյալ Թագավորության, Գերմանիայի, Պորտուգալիայի, Անդորրայի, Սլովակիայի, Շվեդիայի պատվիրակությունների ղեկավարները, ԵԽ հասարակական կազմակերպությունների համաժողովի ղեկավարը:

Նախարարական հանդիպումից առաջ Նալբանդյանի հետ քննարկմանը ԵԽ գլխավոր քարտուղար Թյորբյորն Յագլանդը ընդգծել է, որ Հայաստանը կարող է հպարտ լինել նման նախագահությամբ եւ ակտիվ գործունեությամբ, ու շնորհակալություն հայտնել ակտիվ համագործակցության համար:

Նույն օրը Էդվարդ Նալբանդյանը, ԵԽ գլխավոր քարտուղար Թյորբյորն Յագլանդի եւ Ավստրիայի փոխվարչապետ, եվրոպական եւ միջազգային հարցերի նախարար Միքայել Շպինդելեգերի հետ, մասնակցել է Ստրասբուրգի քաղաքապետարանի առջեւ վեց ամիս շարունակ ծածանվող ՀՀ պետական դրոշը Ավստրիայի պետական դրոշով փոխարինելու արարողությանը:

Մանրամասները` «Ազգ»-ի այսօրվա համարում: