«Հայաստանը»` Թորինոյում

Այս տարվա նոյեմբերի 17-ին Թորինոյում բացվեց «Հայաստանը և հայերը» խորագրով Հայաստանի ու հայերի մասին պատմող երբևէ Իտալիայում տեղի ունեցած ամենամեծ լուսանկարների ցուցահանդեսներից մեկը: Ցուցադրության ներկայացված բոլոր նկարները պատկանում են պոլսահայ, ներկայումս Թորինոյոմ բնակվող Կարեն Կոքչյանին, ով տասնամյակներ շարունակ լինելով Հայաստանում, լոսանկարել է մեր մշակույթի գոհարները,մեր սրբազան վանքերն ու հնամյա ամրոցները, հասարակ մարդկանց, Հայաստանի բնությունը և այլն: Ցուցահանդեսը ընթանում է Թորինայի ամենանշանավոր բացօթյա սրահներից մեկում` Սուբալպինա – յում, որը միջանցիկ մի թանգարանային պատմական սրահ է' կապելու համար մեծ ու պատմական իտալական քաղաքի կենտրոնի երկու հատվածները: Ցուցահանդեսի բացման պաշտոնական արարողությանը ներկա էին Թորինոյի քաղաքապետի պաշտոնական ներկայացուցիչներ, ՀՀ-ում արտակարգ և լիազոր դեսպան Պրն. Սարգիս Ղազարյանը, Իտալիայի Հայոց միության նախագահ Պրն. Պայքար Սվազիլյանը, Իտալիայի Հայոց Եկեղեցու վարչական խորհրդի նախագահ Պրն. Սարո Խուդավերդյանը, Միլանում ՀՀ պատվո հյուպատոս Պրն. Պիերո Քուչուկյանը և այլք:

Ցուցահանդեսի կազմակերպիչ ու հեղինակ Պրն.Կարեն Կոքչյանը առաջին անգամ չէ, որ կազմակերպում է Հայաստանին վերաբերող լուսանկարների ցուցահանդես, սակայն այս մեկն իր որակով և մեծությամբ աննախադեպ է, ինչի մասին վկայում է Սուբալպինա այցելած տասնյակ հազարավոր մարդկանց մասնակցությունը:

Նոյեմբերի 15-ին ցուցահանդեսի կազմակերպչին իր օրհնությունը փոխանցելու և իտալահայկական պատմության մեջ կարևոր այս իրադարձությանը մասնակցելու համար Թորինո էր մեկնել նաև Իտալիայի Հայոց հոգևոր հովիվ Հայր Թովմա Խաչատրյանը:

Այս օրերին Իտալիայի խոշորագույն քաղաքներից Թորինոն շորհիվ Կարեն Կոքչանի կողմից կազմակերպված ցուցահանդեսի` շնչում է Հայաստանի օդը, ըմբոշխնում Հայաստանի մշակույթը, աղոթոմ հայոց հնամյա տաճարներում և վայելում հայոց հյուրասիրությունը: