«Դու պետք ես ինձ, Վարդան... ». Կարինե Ջանջուղազյան

Hraparak.am-ը զրուցել է դերասանուհի Կարինե Ջանջուղազյանի հետ.

-Կարինե, ես ուզում էի մեծ հարցազրույց անել Կարինե Ջանջուղազյան-կնոջ, դերասանուհու, քաղաքացու մասին, բայց այսօր, Ձեր ֆեյսբուքյան պատի գրառումներին հետեւելով, հասկանում եմ, թե որքան եք տառապում Ձեր ընկերոջ՝ Վարդան Պետրոսյանի հետ պատահած այս դժբախտության պատճառով.... հասկանում եմ, որ որեւէ թեմայով հիմա զրույց չի ստացվի: Կուզեի հարցնել. մենք՝ որպես քաղաքացի, ես' որպես լրագրող, դուք` դերասանուհի ու նաեւ Վարդանի ընկեր, ի՞նչ կարող ենք անել...

- Թեեւ իսկապես անկարող եմ որեւէ հարցազրույցի… բայց կասեմ հետեւյալը: Մեր հավատամքն ասում է. նեղության մեջ գտնվողին մի ասա՝ «գնա խաղաղությամբ, Աստված քեզ հետ», այլ արա, ինչ կարող ես, իսկ ով բարին անելը գիտի ու չի անում, մեղք է անոր…

- Ի՞նչն է ավելի շատ տանջում. Վարդանին՝ որպես «հանցագործի» շուտափույթ ձերբակալո՞ւմը, նրա հնարավոր ազատազրկո՞ւմը, թե՞ հոգեվիճակը:

- Երկկողմանի դժբախտություն է տեղի ունեցել, մենք անսիրտ չենք եւ իրոք ի սրտե ցավում ենք այդ երկու չքնաղ երեխաների համար, բայց սա ճակատագրի բերում էր, դժբախտ պատահար: Ցավին ցավ ավելացնելով՝ Վարդանի նման մարդու հետ վերաբերվեցին որպես հանցագործի, այն դեպքում, երբ դեռ իր մեղքն ապացուցված չէ, իսկ դա դժբախտություն է բոլորիս համար, եւ կարիք կար կարեկցելու, լիարժեք բուժելու մարդուն, ոչ թե շուտափույթ, առիթն օգտագործելով, կալանավորելու:

- Մենք Վարդանին բեմում ենք տեսել, նրա ուժը, էներգիան, հոգու լույսը, Դուք, նրա ընկերը լինելով, կարծում եք այնքան ուժ կունենա՞, որ իր մեջ հաղթահարի մեղքի զգացումը... մենք Վարդանին նորից կտեսնե՞նք բեմում...

- Երբ միաբան ենք, ուժ ենք մենք: Մեր բոլոր ուժը պիտի միաբանվի, որ կարողանանք բոլոր տուժողներին զորավիգ լինել: Չեմ կարող հավատալ, որ Վարդանը մեղավոր է: Դա դեռ կպարզվի: Իսկ ակամայից իր մասնակցությունն այդ պատահարին, իր բոլոր հետեւանքներով, չի կարող իր ծանր հետքը չթողնել այդ ազնիվ արտիստի սրտում: Բայց ես գիտեմ, որ Աստված չի լքի Վարդանին ու միեւնույն ժամանակ զոհվածների ընտանիքներին։

- Այս օրերին շա՞տ եք աղոթում։

- Աղոթում եմ, իհարկե, բայց նաեւ վիրավորանքս է մեծ: Վարդանն ազնվական տղա է եւ եթե մեղավոր է (ինչին ես չեմ հավատում), նա ամենայն արժանապատվությամբ կկրի իր մեղքը, բայց այսպես վիրավորել մարդուն իր ազնվության համար… սա արդեն տանելի չէ: Թող մի քիչ ժամանակ անցնի, հետո զրուցենք:

Շարունակությունը` այստեղ: