Ի՞նչն էր միավորել ՀԲ ներկայացուցիչներին և պաշտոնատար անձանց Չարենցավանում (ֆոտո)

Այսօր Չարենցավան քաղաքում տոն էր, վերանորոգման աշխատանքներից հետո իր դռները բացեց Չարենցավանի ″Հրաշք″ մանկապարտեզի 2-րդ մասնաշենքը: Դեռ անցած տարի Չարենցավանի քաղաքապետ Հակոբ Շահգալդյանի նախաձեռնությամբ, ՀՀ նախագահ Սերժ Սարգսյանի անմիջական միջնորդությամբ, Կոտայքի մարզպետ Կավալենկո Շահգալդյանի օժանդակությամբ, սոցիալական ներդրումների հիմնադրամի աջակցությամբ Չարենցավանի քաղաքապետարանի և ՀԲ-ի համաֆինանսավորմամբ մեկնարկեցին Չարենցավանի ″Հրաշք″ մանկապարտեզի վերանորոգման աշխատանքները:

 Կարճ ժամանակում ավարտվեցին նախագծահաշվային աշխատանքներն ու սկսվեց վերանորոգումը: Վերանորոգման աշխատանքներն ավարտվեցին նախատեսված ժամկետում, այնուհետև մանկապարտեզը ստացավ նաև նոր գույք՝ սեղաններ, աթոռներ, պահարաններ, մահճակալներ:

 Այսօր ″Հրաշք″ մանակապարտեզի 2-րդ մասնաշենքը, ինչպես և առաջինը հագեցած է գեղեցիկ ու ներդաշնակ գույներով, մանկական դիզայնի հետաքրքիր լուծումներով, որակյալ գույքով: Այստեղ ստեղծված են ժամանակակից պայմաններ ժամանակակից պահանջներին համապատասխանող կրթություն ու դաստիարակություն ապահովելու համար: Նշենք, որ 2006թ-ին նույն ծրագրով վերանորոգվեց նաև մանկապարտեզի առաջին մասնաշենքը: Այսուհետև մանկապարտեզը կաշխատի իր ողջ ծավալով:

Մանկապարտեզն այսօր շատ հյուրեր ուներ, ՀԲ երևանյան գրասենյակի ղեկավար Ժան Միշել Հապպին, սոցիալական ներդրումների հիմնադրամի գործադիր տնօրեն Աշոտ Կիրակոսյանը, Կոտայքի մարզպետ Կավալենկո Շահգալդյանը, բազմաթիվ պաշտոնատար անձինք և պարզապես չարենցավանցիներ: Հյուրերը շրջեցին վերանորոգված մասնաշենքում, ծանոթացան կատարված աշխատանքների ծավալին ու որակին: Այնուհետև դիտեցին ″Հրաշք″ մանկապարտեզի մասին պատմող փոքրիկ տեսաֆիլմ, իսկ տոնական օրվա իսկական մեկնարկը տվեցին ″Հրաշք″ մանկապարտեզի հրաշք սաներն իրենց ելույթներով:

Տոնական օրը մանկապարտեզը ստացավ բազմաթիվ շնորհավորանքներ: Կոտայքի մարզպետ Կավալենկո Շահգալդյանը իր ողջույնի խոսքում նշեց, որ այս գեղեցիկ աշխատանքը պարտավորեցնող պետք է լինի մանկապարտեզի անձնակազմի համար: Սոցիալական ներդրումների հիմնադրամի գործադիր տնօրեն Աշոտ Կիրակոսյանը կարևորեց մարզային և քաղաքային իշխանությունների նվիրվածությունն ու հոգատարությունը այս աշխատանքները կյանքի կոչելու ճանապարհին: ″Այս աշխատանքը ոգևորիչ են և ցույց է տալիս, որ մենք պետք է շարունակեք նմանատիպ աշխատանքները Հայաստանի զարգացման համար″,- ողջույնի իր խոսքում նշեց Համաշխարհային բանկի երևանյան գրասենյակի նախագահ Ժան Միշել Հապպին:

 Չարենցավան քաղաքի ավագանու որոշմամբ սոցիալական ներդրումների հիմնադրամի գործադիր տնօրեն Աշոտ Կիրակոսյանին շնորհվեց Չարենցավան քաղաքի պատվավոր քաղաքացու կոչում: