Համաշխարհային բանկը 2013-ին 3-4 տոկոս տնտեսական աճ է կանխատեսում Հայաստանի համար

Հայկական Մամուլ 20 Նոյեմբեր, 2013 7:00

Համաշխարհային բանկի Հարավային Կովկասի տարածաշրջանային տնօրեն Հենրի Քերալին երեկ տեղի ունեցած մամուլի ասուլիսի ժամանակ հայտնեց, որ, ՀԲ կանխատեսմամբ, այս տարի Հայաստանի տնտեսական աճը կկազմի 3-4 տոկոս, իսկ եկող տարի` 4-5 տոկոս: Նա նաեւ տեղեկացրեց, որ համաշխարհային տնտեսական աճն այս տարի կանխատեսվում է 2,9 տոկոս, իսկ մեծ ռեսուրսներ ունեցող Ռուսաստանի տնտեսական աճը` 2,5 տոկոս: Սակայն ՀԲ երեւանյան գրասենյակում երեկվա մամուլի ասուլիսի հիմնական թեման Համաշխարհային բանկի կողմից Հայաստանի հետ 2014-17 թթ. գործընկերության ռազմավարության հաստատումն ու նոր ծրագիրը ներկայացնելն էր:

ՀԲ երեւանյան գրասենյակի տնօրեն Ժան-Միշել Հափին , ներկայացնելով Հայաստանի հետ նոր քառամյա գործընկերության ծրագիրը, տեղեկացրեց, որ ՀԲ կողմից մեր երկրին հատկացվելու է 873 մլն դոլար` ներառյալ այս տարի 72 մլն դոլար բյուջետային վարկը: Նոր ռազմավարության հիմնական նպատակը Հայաստանի տնտեսական աճին նպաստելն է մասնավոր հատվածի զարգացման, նոր աշխատատեղերի ստեղծման միջոցով, ինչպես նաեւ աղքատության կրճատումը, պետական կառավարման բարելավումն ու կոռուպցիայի նվազումը, ծրագրերը գյուղական ճանապարհների վերականգնման, կրթության, առողջապահության, սոցիալական ոլորտներում:

Ըստ Համաշխարհային բանկի Հարավային Կովկասի տարածաշրջանային տնօրեն Հենրի Քերալինի, Հայաստանի գումարները տրամադրվելու են լիբոր + 0,5 -1 տոկոս տոսկադրույքով, քանի որ Հայաստանը արդեն միջին եկամուտ ունեցող երկրների թվում է: Տարածաշրջանային տնօրենը հայտնեց, որ վարկերի մի մասը կտրվի ավելի փափուկ պայմաններով` 30 տարով, առաջին 5 տարին առանց վճարների: Նա նշեց, որ Հայաստանը դասվել է միջին եկամուտներ ունեցող երկրների շարքում, իսկ եվրոբոնդեր թողարկել եւ կապիտալի շուկայում ընդգրկվել աղքատ երկրները չեն կարող: Հենրի Քերալին տեղեկացրեց, որ Հայաստանում 1 շնչին ընկնող եկամուտը 2012-ին կազմել է 3700 դոլար, իսկ 2008-ին դա 3400 դոլար էր, ինչը հիմք ընդունելով ՀԲ-ն եզրակացրել է, որ տնտեսական ճգնաժամի փուլը մեր երկիրն անցել է: Նա նշեց, որ աղքատությունը չի նվազել եւ այժմ Հայաստանի բնակչության յուրաքանչյուր երրորդ բնակիչ աղքատության գծից ներքեւ է գտնվում: Հետեւաբարՙ ՀԲ աշխատանքը նույնպես ուղղված է լինելու, որ աղքատները դուրս գան այդ վիճակից, ընդգրկվելով նոր ստեղծվող աշխատատեղերում:

Հայաստանում ներդրումների նվազման խնդրի մասին խոսելովՙ Համաշխարհային բանկի Հարավային Կովկասի տարածաշրջանային տնօրենն ասաց, որ համաշխարհային տնտեսական 2,9 տոկոս աճի կանխատեսումը ամենացածրն է, եւ ոչ միայն Հայաստանը, այլեւ ամբողջ աշխարհն է զգում ներդրումների նվազում: Նա նաեւ ներդրումներ ներգրավելու համար կարեւոր համարեց մեր երկրի մրցունակության բարձրացումը եւ բիզնես միջավայրի բարելավումը, որպեեսզի ներդնողներն ունենան հավասար մրցակցության հնարավորություն եւ շահավետ գործունեություն ծավալեն:

Մանրամասները` «Ազգ»-ի այսօրվա համարում: