Սարգսյան-Ալիև հանդիպումը բանակցության իմիտացիա է. ԱՄՆ-ի նախկին դեսպան

Ադրբեջանում ԱՄՆ-ի նախկին դեսպան Ռիչարդ Կոզլարիչը, մեկնաբանելով Սարգսյան-Ալիև հանդիպումը, հայտարարել է, որ նման հանդիպումներից յուրաքանչյուրը կարող է բանակցային գործընթացի նոր փուլ հանդիսանալ, սակայն մինչ օրս տեղի ունեցածն իր մոտ միայն հոռետեսություն է առաջ բերում, քանի որ ո՛չ Հայաստանը, ո՛չ Ադրբեջանը իրենց բնակչությանը չեն նախապատրաստում այդ գործընթացում նոր փուլին անցնելուն. գրում է  Haqqin.az-ը: 

Նախկին դեսպանը կարծում է, որ նախորդ հանդիպումներն անարդյունք են անցել այն պատճառով, որ նախագահների ընդունած դիրքորոշումը հանգում է կոնֆլիկտի լուծման մեջ միջազգային հանրությանն ու ԵԱՀԿ ՄԽ-ին անգործության մեջ մեղադրելը: 

Եվ այդ դեպքում նախագահներից յուրաքանչյուրը վերադառնում է իր երկիր` ասելով, որ չի զիջել հակառակորդին: Եթե այս անգամ էլ արդյունքը նույնը լինի, Մինսկի խումբը պետք է մտածի, թե կողմերը պատրաստ են արդյոք բանակցելու: Եվ այդ բանակցույթուններն արդյոք միայն բանակցային գործընթացի պատրանք չեն ստեղծում: 

Անդրադառնալով այն գործընթացքում Թուրքիայի ունեցած դերակատարմանը` նախկին դեսպանը նշել է, որ եթե Թուրքիան կարգավորի հարաբերությունները Հայաստանի հետ, ապա դա կօգնի բանակցային գործընթացին:

Մի քանի տարի առաջ Թուրքիան մոտ էր Հայաստանի հետ հարաբերությւոնների նորմալացմանը, սակայն Ադրբեջանը դիմադրեց այդ գործընթացին: Հաշվի առնելով Թուրքիա կատարած այցի ժամանակ Ալիևի ցուցաբերած դիրքորոշումը` դժվար է այստեղ լավատես լինել. ասել է նախկին դեսպանը: