Վարդանին կալանավորելը բարբարոսություն է. Արամոն` Վարդան Պետրոսյանի կալանավորման և տրանսպորտի գնի թանկացման մասին

Սիրված երգիչ Արամոն հիմա ավելի շատ զբաղվում է իր առաջին՝ կինոյի և թատրոնի դերասանի մասնագիտությամբ, երբեմն բացակայում է հանրապետությունից, սակայն քաջատեղյակ է երկրում տեղի ունեցող իրադարձություններից: «Ժողովուրդ» օրաթերթը զրուցել է Արամոյի հետ: Ներկայացնում ենք հարցազրույցից հատված:

-Արամո՛, վերջին շրջանում տարբեր առիթներով իրենց քաղաքացիական, քաղաքական դիրքորոշումն են արտահայտում նաև Ձեր գործընկերները, շոու բիզնեսի ներկայացուցիչները: Ինչպես եք գնահատում այդ փաստը:

-Փաստ է, որ ժողովուրդը ձայնը բարձրացնում, դժգոհում է այն ժամանակ, երբ ինչ-որ մի բան այնպես չէ, սխալ է: Կարծում եմ պետք Է ժողովրդի սրտով գնան, որևէ բան թանկացնելիս հաշվի առնեն ցանկացած մարդու սոցիալական կարգավիճակը: Թանկացումը պետք է գիտակցաբար և ճիշտ լինի, միայն ավելի շատ փող վաստակելու, բիզնեսը ծաղկեցնելու համար գների բարձրացումը լիովին սխալ է: Տրանսպորտի սակագնի բարձրացման դեմ բողոքի շարժմանը լիովին կողմնակից եմ, որովհետև բնակչության գերակշիռ մասի ընտանիքներում սոցիալական այնպիսի վիճակ է, որ այդ 50 դրամը շատ մեծ նշանակություն ունի նրանց համար: Ու շատ լավ է, ողջունելի, որ երիտասարդությունը, նաև, այսպես ասած, շոու բիզնեսի մարդիկ հանդես եկան դրա դեմ: Ես այդ ժամանակ քաղաքում չեմ եղել, նկարահանումների էի:

-Ի՞նչ կասեք Վարդան Պետրոսյանին այդպես հապշտապ կալանավորելու մասին:

-Վարդանն իմ շատ հիանալի ընկերներից մեկն է, պատկառելի մի անձնավորություն՝ սուր մտքի տեր... Նախ հայտնում եմ ցավակցությունս այդ երկու երիտասարդ ձագուկների հարազատներին, ովքեր նոր էին կյանք մտնելու: Իմանալով Վարդանի առաքինի, մաքուր լինելը՝ վստահորեն հերքում եմ այն ասեկոսեները, ըստ որոնց՝ Վարդանը խմիչքի ազդեցության տակ է եղել: Բացարձակապես այդպիսի բան չի կարող լինել: Իսկ ինչ վերաբերում է կալանավորելուն, ապա ուզում եմ հարց տալ՝ նա հո ռեցիդիվի՞ստ չէ: Ինքն էլ ասաց, որ պատժից չի փախչում, միայն խնդրեց, որ թողնեն՝մի քիչ կազդուրվի, հասկանա՝ ինչ է կատարվել, որ ի վիճակի լինի հարցերին պատասխանել: Ի վերջո, նրա մոտ էլ առողջական խնդիրներ կան: Դժբախտ պատահար է տեղի ունեցել, դատաքննչական մարմիններն ամեն ինչ կպարզեն... Եվ այս պարագայում նրան կալանավորելը, ներողություն, պարզապես բարբարոսություն է: Ես սա ասում եմ լավ իմանալով Վարդանի ազնիվ մաքուր լինելը:

-Վերջերս անգամ դերասան Լևոն Հարությունյանը, ով մինչ այդ առանձնապես աչքի չէր ընկել իր ընդդիմադիր կեցվածքով հայտարարեց, թե երկրում հեղափոխություն է անհրաժեշտ, քանի որ այս ձևով հնարավոր չէ շարունակել: Համամի՛տ եք:

-Կառավարությունը և ընդհանրապես այդ էլիտա կոչվածը պետք է հասկանան, որ իրենց շրջապատում են տարբեր մասնագիտության, սոցիալական կարգավիճակի մարդիկ, և իրենք պետք է որոշակի չափով նեցուկ լինեն նրանց: Չէ՜ որ ամեն մարդու, ի վերջո, մայր, ծնող է բերում, և բոլորն ուզում են մարդավայել ապրել:

Հարցազրույցն ամբողջությամբ՝ կարդացեք «Ժողովուրդ» օրաթերթի այսօրվա համարում: