Մահացել է սպորտի վաստակավոր գործիչ Վաչագան Հակոբյանը

Կյանքից 82 տարեկան հասակում հեռացավ ՀՀ ֆիզկուլտուրայի և սպորտի վաստակավոր գործիչ, անվանի մարմնամարզիկ, զինված ուժերի Աշխարհի կրկնակի /1960թ., Բեռլին/, ԽՍՀՄ զինված ուժերի եռակի չեմպիոն, մարզիչ և միջազգային կարգի մրցավար Վաչագան Մկրտչի Հակոբյանը. տեղեկացնում է msy.am-ը: Մեծ է Վ. Հակոբյանի ավանդը մատաղ սերնդի դաստիարակության և ֆիզիկական կուլտուրայի ու սպորտի զարգացման գործում: Նրա աշխատանքը բարձր է գնահատվել և’ խորհրդային և’ Հայաստանի Հանրապետության ժամանակաշրջանում: Աշխարհի շուրջ 35 երկիր է հրավիրվել միջազգային խոշորագույն մրցումներում մրցավարական աշխատանքներ կատարելու համար: Եղել է 22-րդ Օլիմպիական խաղերի կազմկոմիտեի կազմակերպած «Օլիմպիական արբիտր» մրցույթի հաղթողը:
Վաչագան Հակոբյանը պատրաստել է 10-ից ավելի սպորտի վարպետների, այդ թվում ԽՍՀՄ ժողովուրդների 6-րդ սպարտակիադայի չեմպիոն, միջազգային սպորտի վարպետ Վալերի Հայրապետյանին, ՀՀ վաստակավոր մարզիչներ Գագիկ Քեշիշյանին ու Աշոտ Սարգսյանին, մանկավարժական գիտությունների դոկտոր պրոֆեսոր Ռոբերտ Ազարյանին:

Մարմնամարզության նվիրյալը, 2005թվականից մինչ իր մահն հրահանգիչ և մեթոդիստ է աշխատել Հրանտ Շահինյանի անվան մարմնամարզության օլիմպիական մանկապատանեկան մարզադպրոցում:

- Անհանգիստ բնավորություն ուներ, մինչև վերջին օրն էլ աշխատեց, 2 օր առաջ էլ մարզադպրոցում էր: Իր խորհուրդներով օգնում էր և’ մարզիչներին և’ սաներին,- ասաց Վ. Հակոբյանի գործընկեր Սարգիս Գալստյանը:

Մարզաշխարհի անմնացորդ նվիրյալի, անվանի մարզչի Վաչագան Հակոբյանի խնկելի հիշատակը վառ կմնա նրան ճանաչողների սրտերում:

Լուրեր.com-ը ցավակցում է Վաչագան Հակոբյանի ընտանիքին: