Սովետական Միության ֆենոմենն անմար է. «Տեսնենք Պուտինի գալուց ինչ կփոխվի»

«Հրապարակ» օրաթերթի գլխավոր խմբագիր Արմինե Օհանյանն այսօրվա խմբագրականում գրում է.

Ողջ երկիրը պատրաստվում է ՌԴ նախագահի այցին: Սովետական ժամանակների ոգով՝ ճանապարհներ են ասֆալտում, անվտանգության միջոցառումներ ու նախապատրաստական այլ աշխատանքներ տանում: Հակապուտինյան, հակառուսական տրամադրություններ ունեցողները ևս նախապատրաստվում են՝ ուզում են «պատշաճ» դիմավորել Ռուսաստանի նախագահին՝ տարբեր կրեատիվ պաստառներով ու ակցիաներով, որ չստացվի, թե ուկրաինացիք ավելի արևմտամետ ու ազատամիտ են, քան մենք: Եվ այնպես չէ, որ մեր ողջ հասարակությունն է անհույս ռուսամետ, կան նաև այլընտրանքային մտածողության տեր խմբեր: Դրանք, իհարկե, դատելով Մաքսային միության անդամագրման դեմ պայքարի էպիզոդներից, մի քանի հարյուր անձը չեն գերազանցում: Ավելին՝ մեր ինտելեկտուալ, բարձր վարձատրվող, ուստիև ենթադրաբար բարձր գիտակցություն ունեցող մասսային ավելի շատ հուզում է Կուտակային հիմնադրամի ներդրումը և իրենցից գանձվող 5 տոկոսանոց հարկը, քան երկրի ճակատագիրը:

Ընդհանրապես՝ մեր ժողովուրդը գաղափարական պայքարի, սկզբունքների համար կռվելու հակված չէ: Ընդվզումների հայկական պատմությունը շատ անտրամաբանական է և անկանխատեսելի: Երբեք հնարավոր չէ գուշակել, թե ինչից կհուզվի ՀՀ քաղաքացին և երբ կելնի փողոց: Նա կարող է Պուտինի այցից էյֆորիա ապրել և Կոմիտաս 5-ի 7 հարկանի շենքը կառուցող բուլդոզերի տակ պառկել, Լեզվի մասին օրենքում փոփոխությունը կարող է նրան հանել փողոց, իսկ Երևանի պատմամշակութային կենտրոնի հիմնովին ավերը ոչ մի հույզ չառաջացնել: Ինչ է ակնկալում շարքային մարդը Վլադիմիր Պուտինի Հայաստան կատարելիք այցից, դժվար է ասել: Բայց երբ իր կյանքից խիստ դժգոհ տաքսիստը երկար ճառից հետո ասում է՝ «Տեսնենք Պուտինի գալուց ինչ կփոխվի», հասկանում ես, որ Սովետական Միության ֆենոմենն անմար է:

Մանրամասները` «Հրապարակ»-ի այսօրվա համարում: