Այդ ամենը զառանցանք է. Մանվել Գրիգորյանը չի հրաժարվի ԵԿՄ ղեկավարի պաշտոնից

Օրեր առաջ տեղեկատվություն տարածվեց ԱԺ ՀՀԿ-ական պատգամավոր, ԵԿՄ նախագահ, գեներալ Մանվել Գրիգորյանի առողջական վիճակի վատթարացման մասին, սակայն այդ լուրերը չէին համապատասխանում իրականությանը:

Այս անգամ մամուլում լուրեր տարածվեցին, որ քաղաքական շրջանակներում չեն բացառում, որ ելնելով առողջական վիճակից` արտերկրում բուժվող գեներալ Մանվելը, հնարավոր է, թողնի Երկրապահ կամավորականների միության ղեկավարի պաշտոնը:

Լուրը ճշտելու նպատակով Լուրեր.com-ը զրուցեց ԵԿՄ վարչության մամուլի պատասխանատու Վարդան Վարդանյանի հետ, ով հերքեց տարածված տեղեկությունները:

«Վերջերս մեկ անգամ էլ նման լուրեր տարածվեցին: Ցավալին այն է, որ ստիպված ենք լինում ժամանակ առ ժամանակ նման անհեթեթությունները մեկնաբանել, իսկ մարդիկ այս զառանցանքները սկսում են քննարկել:

Բնականաբար, չկա նման բան: Գեներալ Մանվելը մեծ պատասխանատվությամբ է վերաբերվում այն փաստին, որ Վազգեն Սարգսյանի ողբերգական մահվանից հետո երկրապահական ընտանիքը միայն իրեն վստահեց երկրապահ կառույցի ղեկավարումը, միայն իրեն արժանի համարեցին: Այժմ ինչպե՞ս կարող է նա այդ ամենը մի կողմ դնել:

Գեներալն առողջական խնդիրներ ուներ, բայց այժմ բժիշկները շատ լավ են գնահատում նրա վիճակը: Իսկ այդ բոլոր խոսակցությունները զառանցանքեր են: Ես նույնիսկ, տեսնելով վարչության անդամների տրամադրությունները, շարքային անդամների տրամադրությունները, համոզմունք ունեմ` փետրվարին կայանալիք ընտրություններին ԵԿՄ վարչության կողմից Մանվել Գրիգորյանը կվերընտրվի միության նախագահ»,-ասաց Վարդանյանը: