Վիլնյուսում Հայաստանի հետ առանձին փաստաթղթի ստորագրումը շատ փոքր հավանականություն ունի

Արեւելյան գործընկերության երկրներից Հայաստանի, Ադրբեջանի, Վրաստանի ու Ուկրաինայի նախագահները, Մոլդովայի վարչապետն ու Բելառուսի արտգործնախարարը կմասնակցեն նոյեմբերի 28-29-ին Վիլնյուսում տեղի ունենալիք Արեւելյան գործընկերության գագաթաժողովին: Այս մասին երեկ տեղեկացրեց Եվրոպական հանձնաժողովի մամուլի հաղորդագրությունը: Այսինքն` Հայաստանը Վիլնյուսի գագաթաժողովում ներկայացված է լինելու ամենաբարձր` նախագահ Սերժ Սարգսյանի մակարդակով, սակայն այդ մասին տեղեկացումն առաջինը ստացվեց:

Եվ միայն ժամեր անց Հայաստանի նախագահի պաշտոնական կայքէջում հայտնվեց տեղեկատվություն, որ նախագահ Սերժ Սարգսյանը նոյեմբերի 28-ին երկօրյա աշխատանքային այցով կմեկնի Լիտվայի Հանրապետություն մասնակցելու Վիլնյուսում կայանալիք Եվրոպական ժողովրդական կուսակցության (ԵԺԿ) եւ ԵԺԿ Արեւելյան գործընկերության պետությունների ղեկավարների գագաթաժողովներին: Նույն հաղորդագրության համաձայն այցի շրջանակներում Վիլնյուսում նախատեսվում են նաեւ հանրապետության նախագահի երկկողմ ձեւաչափով հանդիպումներ:

Իսկ մամուլի հաղորդագրությունը, որ հրապարակվեց ԵՀ պաշտոնական կայքէջում, տեղեկացնում է նաեւ, որ գագաթաժողովին մասնակցելու են ինչպես Արեւելյան գործընկերության երկրները, այնպես էլ ԵՄ 28 անդամ պետությունների ղեկավարները:

Գագաթաժողովը կնախագահի Եվրոպական խորհրդի նախագահ Հերման վան Ռոմպեյը` Եվրոպական հանձնաժողովի նախագահ Ժոզե Մանուել Բարոզզոյի հետ: Գագաթաժողովին կմասնակցեն նաեւ Եվրոպական խորհրդարանի նախագահ Մարտին Շուլցը, ԵՄ արտաքին հարաբերությունների ու անվտանգության քաղաքականության հարցերով բարձր ներկայացուցիչ, ԵՀ փոխնախագահ Քեթրին Էշթոնը, ընդլայնման ու եվրոպական հարեւանության քաղաքականության հարցերով հանձնակատար Շտեֆան Ֆյուլեն ու առեւտրի հարցերով հանձնակատար Կարել դե Գուխտը:

Երկօրյա գագաթաժողովի օրակարգով նոյեմբերի 28-ի համար ըստ էության ոչ պաշտոնական ընթրիք է նախատեսված: Նոյեմբերի 29-ին արդեն, ըստ լիտվական նախագահության պատրաստած օրակարգի, կլինեն ստորագրման արարողություններ` առանց մանրամասնելու, թե ինչ է ստորագրվելու եւ ում միջեւ: Այդուհետեւ հենց նստաշրջանն է, որին կհաջորդի մամուլի հաղորդագրությունը:

«Ազգի» տեղեկություններով Հայաստանի հետ առանձին փաստաթղթի ստորագրումը շատ փոքր հավանականություն ունի, քանի որ Հայաստանի անունից ինչ-որ բան առաջարկվել է, բայց արտգործնախարար Էդվարդ Նալբանդյանի տարբեր երկրների այցելությունները թերեւս բավարար չէին շատ կարճ ժամանակում ԵՄ-ի անդամ երկրների համաձայնությունն այդ փաստաթղթի առնչությամբ ստանալու համար, ինչը պարտադիր պայման է ԵՄ-ի հետ որեւէ փաստաթուղթ համաձայնեցված համարելու համար:

Մանրամասները` «Ազգ»-ի այսօրվա համարում: