«Հեղեղվող Տապան». Հայկ Հրայր
Գիտություն և Մշակույթ
Հիմա այն ինչ որ
Գրված է սիրո
Բոլոր գրքերում՝
Ժայռափորերից
Մինչեւ այս տողը,
Տիեզերական ոտնահետքերից
Մինչեւ Սահարա,
Բոլոր հանճարեղ
Մտքերի թելից,
Հին ու նոր խոսքի
Աստվածաշնչից՝
Ես արտագրում եմ
Ու նվիրում քեզ՝
Իմ կյանքի երակ,
Սիրո օրօրոց,
Դատարկվող խորան…
Բոլոր գրքերից,
Որ ունեն ցավի գրառված էջեր,
Տագնապի ձայներ՝
Սպիտակ ու սեւ,
Կանաչ ու կարմիր,
Ես արտագրում եմ
Ու նվիրում քեզ՝
Իմ կյանքի բարուր,
Վիրավոր հրաշք,
Հեղեղվող Տապան,
Երկիր՝Հայաստան,
Լքվող ցավի վերք…
Նվիրում եմ քեզ՝
Անձուկ ամոթով,
Որ թափանցում է
Ներսս տագնապի,
Հուսահատության
Այսպիսի տողեր,
Թեկուզ տոգորված՝
Սիրո մղումով…
Չսիրես դու ինձ,
Չսիրես երբեք,
Որ սիրում եմ քեզ
Քեզանից հեռու
Մի օտարի պես՝
Տաքուկ ափերում՝
Ապահով ու հեշտ…
Չթողնես դու քեզ,
Չթողնես՝ երբեք,
Որ համարձակվեն
Քեզ սիրեն ինձ պես,
Քեզ սիրեն այսպես…
Իմ սուրբ Հայաստան,
Բիբլիական կանչ,
Տագնապի Տապան,
Աղերսող Խորան,
Թող փրկյա քեզ Տեր…
Թող փրկյա քեզ Տեր…
Հայկ Հրայրի ֆեյսբուկյան էջից
ՈՒՂԻՂ ԵԹԵՐ
Ամենադիտված 
Ադրբեջանից ներմուծված բենզինը պետք է մնա բենզալցակայաններում, չպետք է օգտվեն դրանից (տեսանյութ)
