Ռուս իրավապաշտպանները վերապատրաստվում են ՀՀ օմբուդսմենի աշխատակազմում

Հայաստանի Օմբուդսմենի աշխատակազմում վերապատրաստվելու նպատակով Ռուսաստանի Դաշնությունից Երևան են ժամանել յոթ ճանաչված իրավապաշտպաններ: Փակ հաստատություններում Հայաստանի Օմբուդսմենի մոնիթորինգային փորձը համարելով օրինակելի' Եվրոպայի խորհուրդը նախաձեռնել է փորձի փոխանակման այս ծրագիրը, որի նպատակն է ռուս իրավապաշտպաններին ծանոթացնել Հայաստանի Օմբուդսմենի ինստիտուտում գործող Բռնությունների կանխարգելման ազգային մեխանիզմի արդյունավետ գործունեությանը:

Հայաստանում ռուս իրավապաշտպանների վերապատրաստման այս նախաձեռնությունն իրականացվում է Օմբուդսմեն Կարեն Անդրեասյանի և Ռուսաստանի իր գործընկեր Վլադիմիր Լուկինի համագործակցության շրջանակներում՝ Եվրոպայի խորհրդի Մարդու իրավունքների և խտրականության դեմ պայքարի դիրեկտորիատի աջակցությամբ:

Եռօրյա այցի ընթացքում ռուս իրավապաշտպաններն այցելել են բանտեր, ոստիկանության բաժանմունքներ, հատուկ դպրոցներ և հոգեբուժարաններ: Այցերի ժամանակ Հայաստանի Օմբուդսմենի ինստիտուտում ձևավորված Բռնությունների կանխարգելման մեխանիզմի իրավապաշտպանները ռուս գործընկերներին ներկայացրել են փակ հաստատություններում մոնիթորինգ իրականացնելու իրենց փորձն ու հմտությունները, ինչպես նաև անցկացրել են գործնական աշխատանքներ:

Նոյեմբերի 29-ին տեղի կունենա այցի ամփոփիչ քննարկումը, որի ընթացքում ռուս իրավապաշտպանները Հայաստանի Օմբուդսմենին կներկայացնեն այս ընթացքում ստացած իրենց տպավորությունները: Օմբուդսմենի հետ հանդիպմանը կմասնակցեն նաև տեղական իրավապաշտպան կազմակերպությունների ներկայացուցիչներ: