Ցարական ինքնակալության հերթական դրսևորումները ՀՀ նախագահականում

Արդեն մի քանի օր է, ինչ Գյումրիում և Երևանում խուճապային իրավիճակ է` ասֆալտապատում, մաքրություն, լյուկերի վերանորոգում և այլն, իսկ պատճառը... Պատճառը, թերևս, հայտնի է բոլորին. Հայաստան է գալիս ՌԴ նախագահ Վլադիմիր Պուտինը, ով կլինի Գյումրիում, այնուհետև կմեկնի Երևան և նույն օրն էլ կվերադառնա իր հայրենի Ռուսաստան:

Պարզվում է` Պուտինն իր հետ, բացի զրահապատ մեքենայից և կորտեժից, Հայաստան է բերում նաև մի «բանակ» ԶԼՄ-ի ներկայացուցիչներ. տեղական լրատվամիջոցների համար տեղ չկա. հայտնում են նախագահականից:

«Ներողություն ենք խնդրում, բայց այս անգամ չենք կարող Ձեզ հավատարմագրել, քանի որ տեղի խնդիր ունենք»,-ահա այսպիսին եղավ պատասխանը նախագահականից, երբ փորձեցինք հավատարմագրվել Պուտինի այցը լուսաբանելու համար:

Հարցին, թե կոնկրետ էլեկտրոնային լրատվամիջոցների համա՞ր է նախատեսված տեղը սպառվել, թե՞ բոլոր ԶԼՄ-ների, հնչեց պատասխան, որ Ռուսատանից բավական շատ լրատվամիջոցների ներկայացուցիչներ են եկել Պուտինի այցը լուսաբանելու համար, այդ իսկ պատճառով հայկականների համար տեղերը քիչ են մնացել, որոնք էլ արդեն սպառված են:

Նման խնդրի առաջ են կանգնել նաև մի քանի էլեկտրոնային լրատվամիջոցներ ևս, սակայն նրանց պարագայում եղել է խոստում, որ դեռևս հավատարմագրման կարգը հայտնի չէ, և հեռախոսահամար թողնելու դեպքում իրենք անպայման կկապվեն ԶԼՄ-ի ներկայացուցչի հետ, սակայն սպասված զանգն այդպես էլ չի եղել:

Զարմանալի է, թե ինչու նախագահականում դռները բացեցին կայսերական լրատվամիջոցների համար, իսկ հայկական կայքերը ստորադասվեցին «պախանի» ուղեկիցներից: Ցավալի է, որ ցարական պաշտամունքը հովանավորվում է հենց նախագահական նստավայրից: Մինչդեռ մեր հասարակության կարծիքը նորմալ իշխանության համար պետք է առավել կարևոր լիներ, քան այն, թե ինչ կբարեհաճեն մի քանի տողով շպրտել իրենց անկարևոր էջերում Պուտինի սուրհանդակները...