Պուտինի` Երևան գալուն ընդառաջ. ՌԴ դրոշներ, ԽՍՀՄ շրջանի երգեր

Այսօր ՀՀ նախագահ Սերժ Սարգսյանի հրավերով ՌԴ նախագահ Վլադիմիր Պուտինի՝ Հայաստան կատարվելիք պետական այցի կապակցությամբ այս պահին Երևանում ընթանում է հայ և ռուս ժողովուրդների բարեկամությունը խորհրդանշող հուշարձանի բացման արարողությունը։ Նալբանդյան-Խանջյան փողոցների խաչմերուկում գտնվող պուրակում՝ Մ. Նալբանդյանի արձանի դիմաց կառուցված, խաչ բռնած երկու կանանց արձանի տակ փորագրված է՝ «Օրհնյա՛լ է հայ և ռուս դարավոր բարեկամությունը»:

Lurer.com–ի թղթակցի փոխանցմամբ` հուշարձանի բացման արարողությանը ներկա են ՀՀ վարչապետ Տիգրան Սարգսյանը, ՌԴ տրանսպորտի նախարար Մակսիմ Սոկոլովը և այլ պաշտոնատար անձինք։ Մեր թղթակցի փոխանցմամբ՝ ներկաներին, որոնց մեծամասնությունը պետական սեկտորի աշխատակիցներ են, բաժանվել են փոքրիկ դրոշակներ՝ ՌԴ պետական դրոշի գույներով, և վաղ առավոտից հնչեցվում են ռուսական, և նույնիսկ` ԽՍՀՄ ժամանակաշրջանի հայտնի երգեր։

Հիշեցնենք նաև, որ Հայաստան Վլադիմիր Պուտինի պետական այցի շրջանակներում Երևանում՝ նախագահական նստավայրում, կկայանան երկկողմ բանակցություններ: Կողմերը կքննարկեն նախագահ Սերժ Սարգսյանի՝ ս.թ. սեպտեմբերի 3-ին ՌԴ կատարած այցի ժամանակ ձեռքբերված պայմանավորվածությունների կատարման ընթացքը, մտքեր կփոխանակեն նաև Մաքսային միությանը և Միասնական տնտեսական տարածքին Հայաստանի միանալու ուղղությամբ իրականացվող աշխատանքների և հետագա քայլերի շուրջ: