Մեր իշխանությունը կորցրել է ազգային արժանապատվության վերջին նշույլները

«Հրապարակ» օրաթերթի գլխավոր խմբագիր Արմինե Օհանյանն այսօրվա խմբագրականում գրում է.

Առողջ տրամաբանությունն ասում է, որ անգամ եթե կյանքի բերումով և իրերի պարտադրանքով մենք հայտնվել ենք «ռուսի սապոգի» տակ, պետք է գոնե փորձեինք մեր դեմքն ամբողջովին չկորցնել և «սապոգի» տիրոջը հասկացնել, որ ինչպես կամովին ու անսպասելի «պառկել ենք» այդ «սապոգի» տակ, նույնքան անսպասելի էլ կարող ենք դուրս գալ այդ ստորացուցիչ վիճակից: Իսկ դա ցուցադրելու լավագույն եղանակը պուտինյան այցի ժամանակ մի քիչ «ատամ» ցույց տալը կլիներ, որ մտադիր էին անել հայաստանյան փոքրաթիվ հակառուսական ուժերը և անկախական ջահելները:

Այս պարագայում ի՞նչ էր մնում անել իշխանությանը՝ ցուցադրել, որ ինքը դրա հետ կապ չունի, հասարակության մեջ մի մե՜ծ շերտ կա, որը դեմ է Մաքսայինին ու նեոսովետիզմի վերադարձին, և այդ ուժերն ուժե՜ղ ճնշում են գործադրում իր վրա: Եվ միայն Ռուսաստանի հանդեպ իրենց մեծ սերն ու անձնուրաց նվիրումն է ստիպում հաղթահարել այս անասելի դժվարություններն ու Հայաստանը տանել դեպի Մաքսային անորոշ ապագա: Այս սցենարի իրականացման համար անհրաժեշտ էր, որ ոստիկանությունը ոչ թե մի բուռ պայքարող ակտիվիստներին արգելեր ակցիաներ անելը, ծեծեր, բռնությամբ լցներ ոստիկանական մեքենաներն ու տաներ բաժիններ, ապա ողջ օրը հայտարարություններ տարածեր, թե՝ կարգը խախտողները կպատժվեն և այլն: Այլ անհրաժեշտ էր, որ ոստիկանությունն ընդհանրապես չմիջամտեր այս ակցիաներին: Ավելին՝ խելացի իշխանության պարագայում, անգամ իշխանական որոշ ներկայացուցիչներ ևս պետք է հանդես գային հակապուտինյան հայտարարություններով ու մասնակցեին բողոքի այդ ակցիաներին: Բայց սա, անշուշտ, հնարավոր կլիներ, եթե մեր իշխանությունը կորցրած չլիներ ազգային արժանապատվության վերջին նշույլները և ողջամտության վերջին պաշարները:

Մանրամասները` «Հրապարակ»-ի այսօրվա համարում: