Շատ էի ցանկանում չեմպիոն դառնալ արտերկրում. Ռոբերտ Արզումանյան

Հայաստանի ազգային հավաքականի և «Ակտոբեի» ֆուտբոլիստ Ռոբերտ Արզումանյանը sports.kz-ին տված հարցազրույցում նշել է.

«Մրցաշրջանն «Ակտոբեի» համար հաջող էր՝ դարձանք Ղազախստանի չեմպիոն:

Երկար ճանապարհ անցանք Եվրոպայի լիգայում: Ցավում եմ, որ չկարողացանք դուրս գալ խմբային փուլ: Անձամբ իմ համար մրցաշրջանը բավարար էր, կարող էր ամեն ինչ ավելի լավ լինել, սակայն վնասվածքների պատճառով չկարողացա լավագույն մարզավիճակս ձեռք բերել: Հուսով եմ` հաջորդ տարի ամեն ինչ ավելի լավ կլինի:

5 անգամ դարձել եմ Հայաստանի չեմպիոն, սակայն ղազախական չեմպիոնությունը մի փոքր այլ զգացմունքներ առաջացրեց: Շատ էի ցանկանում արտերկրում չեմպիոն դառնալ, և շատ ուրախ եմ դրա համար: Այս մրցաշրջանում մի քանի խաղ բաց թողեցի մկանային վնասվածքի պատճառով, այնուհետև խնդիրներ ունեցա ծնկիս հետ կապված, այլ վնասվածքներ չեմ ունեցել:

Ասում են` խաղը հաղթում են հարձակվողները, իսկ առաջնությունը` պաշտպանները (ծիծաղում է...): Այսինքն` առանց լավ պաշտպանության` հնարավոր չէ չեմպիոն դառնալ: Մենք պաշտպանության խաղի վրա շատ ենք աշխատել մարզումների ժամանակ: Ինքս կենտրոնական պաշտպան եմ, և իհարկե, ինձ համար ավելի հարմար է խաղալ այդ դիրքում, սակայն հուսով եմ, որ թիմին օգուտ տվեցի նաև այն ժամանակ, երբ խաղում էի պաշտպանության աջ եզրում:

Պայմանագիրս կգործի ևս 1 տարի: Հանգիստս անցկացնում եմ տանը: Համոզված եմ, որ մեր երկրպագուները լավագույնն են Ղազախստանում: Շատ հիանալի ակումբներ այս առումով կնախանձեին մեզ: Վստահ կարելի է ասել, որ մեր երկրպագուները մեր 12-րդ խաղացողն են»,-նշել է Արզումանյանը: