Վրաստանի բանտերում խոշտանգումներն արմատախիլ են արվել. Ղարիբաշվիլի

Վրաստանի նոր իշխանությունների խնդիրն է ստեղծել եվրոպական պետություն: Այս մասին այսօր հայտարարել է Վրաստանի վարչապետ Իրակլի Ղարիբաշվիլին մարդու իրավունքների պաշտպանությանը նվիրված մամուլի ասուլիսում:

Ղարիբաշվիլիի խոսքով՝ վերջին տարին Վրաստանում եղել է ժողովրդավարության ամրապնդման տարի:

«Մեր խնդիրն է կառուցել եվրոպական պետություն, ինչն առաջին հերթին ենթադրում է ժողովրդավարության բարձր աստիճանի և մարդու իրավունքների պաշտպանության ներմուծում»,-ասել է Ղարիբաշվիլին՝ հավելելով, որ «այժմ Վրաստանում նոր իրականություն է և դրանում մեծ դեր ունի հենց Եվրամիությունը և մեր գործընկերները»:

Անդրադառնալով ներքին խնդիրներին՝ վարչապետն ասել է, որ Վրաստանի նոր կառավարությանը մեկ տարվա ընթացքում հաջողվել է արմատախիլ անել խոշտանգումները և անմարդկային վերաբերմունքը բանտերւմ: 

Հիշեցնենք, որ շատ փորձագետների կարծիքով` 2012թ. խորհրդարանական ընտրություններում իշխող «Միասնական ազգային շարժում» կուսակցության պարտության պատճառը Գլդանի բանտում բանտարկյալների կտտանքների տեսանյութն էր:

«Մեր իշխանությանը բաժին է ընկել ծանր ժառանգություն` մարդու իրավունքների պաշտպանության տեսանկյունից: Աշխարհը ցնցեցին բանտարկյալների խոշտանգումների կադրերը: Դա մի հանցագործություն էր, որը նախկին իշխանությունները որակեցին որպես համակարգային ձախողում: Վերջին մեկ տարում մենք կարողացել ենք ամբողջությամբ արմատախիլ անել խոշտանգումները և անմարդկային վերաբերմունքը»,-ասել է Ղարիբաշվիլին, որի խոսքերը մեջբերում է Novosti Gruzia-ն: