«Ծխել, թե՞ ապրել» ծրագիրը շրջում է ՀՀ մարզերում

«Երիտասարդ քիմիկոսների ասոցիացիա» ՀԿ-ն նոյեմբերի 8-ից դեկտեմբերի 8-ն ընկած ժամանակահատվածում ՀՀ մարզերի 10 դպրոցներում իրականացնում է «Ծխել, թե՞ ապրել» ծրագիրը:

12-16 տարեկան 300 աշակերտների շրջանում անցկացվում են տեղեկատվական դասընթացներ, որոնց ընթացքում ներկայացվում է ծխելու վնասակար ազդեցությունը մարդու օրգանիզմի վրա` քիմիայի, կենսաբանության և բժշկության տեսանկյունից։ Աշակերտներին ցուցադրվում է քիմիական փորձ, որի օգնությամբ պատկերավոր կերպով ներկայացվում է, թե ինչ է տեղի ունենում ծխելիս մարդու թոքերում։ Աշակերտները նաև դիտում են ֆիլմ` ծխախոտի վնասակար ազդեցության մասին:

Ծրագրի համակարգող Վիկտորյա Ռսկատյանը տեղեկացրեց, որ թեման աշակերտներին շատ է հետաքրքրել: Նրանք հատկապես ոգևորվում են քիմիական փորձերին մասնակցելիս: Խոսելով արդյունքների և նման ծրագրերի իրականացման հրատապության մասին` Վիկտորյա Ռստակյանն ասաց. «Ի տարբերություն Երևանի` մարզերում աշակերտները հիմնականում չեն ծխում: Դա միանգամից ակնհայտ է դառնում, երբ մուտք ես գործում դասարան: Ուստի մեր հիմնական նպատակն է շեշտադրում անել նաև նրա վրա, որ ծնողները երեխաների ներկայությամբ չծխեն: Գյուղական համայքներում գտնվող դպրոցների աշակերտները հիմնականում լավ տեղեկացված չեն ծխելու բացասական հետևանքների մասին, մինչդեռ Վանաձորի դպրոցում աշակերտները քաջատեղյակ էին խնդրին»:

Ծրագրի համակարգողը փաստեց, որ տեղեկատվական դասընթացները ոչ միայն օգնում են աշակերտներին գիտելիքներ ստանալ ծխելու բացասական հետևանքների մասին, այլև հնարավորություն են ընձեռում կիրառել քիմիայի դասաժամերին ձեռք բերած գիտելիքները: Վիկտորյա Ռստակյանը կարծում է, որ եթե յուրաքանչյուր դասարանից գոնե մեկ կամ երկու աշակերտի վրա ծրագիրն ազդեցություն գործի, ուրեմն իրենք հաղթանակ են տարել:

Տեղեկացնենք, որ «Ծխել, թե՞ ապրել» ծրագիրն անցկացվում է Հայաստանի երիտասարդական հիմնադրամի' որպես ՀՀ նախագահի կողմից ընտրված գործընկեր կազմակերպության կողմից հայտարարված դրամաշնորհային մրցույթի շրջանակներում։

Հայաստանի երիտասարդական հիմնադրամի հասարակայնության հետ կապերի ծառայություն