Արմեն Եսայանը շատ ինֆորմացված և ուժեղ անձնավորություն է. Արա Զոհրաբյանը՝ Արմեն Եսայանի նշանակման մասին

ՀՀ գլխավոր դատախազության հատուկ հանձնարարությունների հարցով ավագ դատախազ, ՀՀ արդարադատության երրորդ դասի պետական խորհրդական, իրավաբանական գիտությունների դոկտոր, պրոֆեսոր Արմեն Կառլենի Եսայանի` ՓՊ նախագահի գլխավոր խորհրդականի և գիտաուսումնական խորհրդի նախագահի պաշտոնում նշանակման կապակցությամբ «Առավոտ» օրաթերթը զրուցել է ՀՀ Փաստաբանների պալատի նախագահ Արա Զոհրաբյանի հետ:

-Պարո՛ն Զոհրաբյան, ինչո՞վ կբացատրեք Արմեն Եսայանի նշանակումը գլխավոր խորհրդականի և գիտաուսումնական խորհրդի նախագահի պաշտոնում:

-Ցանկացած կազմակերպության ղեկավար, կարծում եմ, պետք է իր կադրային քաղաքականությունն իրականացնելիս ղեկավարի առավելագույնի սկզբունքով: Այսինքն` պետք է փորձի պրոֆեսիոնալ կադրերով համալրել կառույցը, ինչի պայմաններում միայն կարելի է խոսել կառույցի գործունեության արդյունավետության մասին: Արմեն Եսայանը իրավաբանական գիտությունների դոկտոր է, պրոֆեսոր և բարձր հեղինակություն վայելող անձ: Դրան ավելացրած` օժտված է անմնացորդ հայրենասիրությամբ և պետական մտածելակերպով: Վստահ եմ, որ մեր Փաստաբանների պալատը շահել է, այն առումով, որ մեզ մոտ այսուհետ աշխատելու է Արմեն Եսայանը:

- Բայց Ձեզ չի՞ անհանգստացնում այն հարցը, որ Արմեն Եսայանը դատախազությունը համարում է իր ընտանիքը, լավ է վերաբերվում Գևորգ Կոստանյանին, իսկ դատախազությունը միշտ էլ հանդես է եկել որպես փաստաբանների «թշնամի»:

- Ո՛չ, ինձ այդ փաստն ընդհանրապես չի անհանգստացնում: Արմեն Եսայանի հետ մեր հարաբերություններն անձնական բնույթ են կրում, նա իմ ընկերն է և նրա համաձայնվելը աշխատել Փաստաբանների պալատում բացառապես պայմանավորված է դրանով: Երկրորդ` Արմեն Եսայանն անկախ մարդ է` իր սկզբունքներով: Ով ճանաչում է նրան, գիտի նրա սկզբունքայնությունն ու անկախությունը, ինչին բազմիցս ականատես եմ եղել: Ես չեմ լսել մի դեպք, որ Արմեն Եսայանի հետ որևէ պաշտոնատար անձ խոսի «պետք է»-ով: Ի վերջո, ցանկացած նախաձեռնության դատավորը ժամանակն է: Ինչ վերաբերում է փաստաբան-դատախազ հարաբերություններին, ապա, իմ կարծիքով, փաստաբանները ոչ թե դատախազների թշնամիներն են, այլ դատախազների դատավարական հակառակորդները: Դատավարական այդ կարգավիճակն է ապահովում իրական մրցակցություն` մեղադրանքի և պաշտպանության կողմերի միջև:

-Բայց Արմեն Եսայանը չի թաքցնում, որ Աղվան Հովսեփյանն իր մերձավորն է, իսկ գաղտնիք չէ, որ Աղվան Հովսեփյանն ապագա քննչական միասնական կոմիտեի ղեկավարն է:

- Դա խոսում է Արմեն Եսայանի դաստիարակության մասին: Նա հարգում է իր ավագ գործընկերներին նույնիսկ նրանց հեռանալուց հետո, իսկ դա, ընդունեք, խրախուսելի է և խոսում է միայն մարդկային լավ որակի մասին: Արմեն Եսայանը ՀՀ վաստակավոր բժիշկների ընտանիքից է: Նրա հայրը` Կառլեն Եսայանը, ճանաչված և հարգված մարդ է, իսկ պտուղը ծառից են ճանաչում, և` հակառակը: Հատկանշական է, որ Արմեն Եսայանը, հաշվի առնելով մեր հարաբերությունների բարձր մակարդակը, համաձայնել է ընդունել իմ առաջարկը` աշխատել Փաստաբանների պալատում:

- Իսկ փաստաբանների վերաբերմունքն ինչպիսի՞ն է այս նշանակման կապակցությամբ: Դժգոհություններ չե՞ք լսում:

- Այն փաստաբանները, ովքեր ճանաչում են Արմեն Եսայանին, արձագանքել են միանգամից, նշելով, որ Փաստաբանների պալատը հզորանում է: Այն փաստաբանները, ովքեր չեն ճանաչում, միգուցե հարցեր ունենան իրենց մեջ, բայց համոզված եմ, որ դրանց պատասխանները կգտնեն իրենց վերլուծությամբ և Փաստաբանների պալատի գործով: Ես այս նախաձեռնության մասին ներկայացրել եմ նաև Փաստաբանների պալատի խորհրդի անդամներին և որևէ առարկություն չեմ լսել:

Ես հասկանում եմ, որ որոշ «մտահոգություններ» և ինտրիգներ կստեղծվեն դրսի ուժերի կողմից, և այն կարող է դրսևորվել որոշ փաստաբանների և լրագրողների միջոցով: Դրա բացատրությունը շատ պարզ է: Բազմիցս լսելի են դարձել, որ Արմեն Եսայանը շատ ինֆորմացված և ուժեղ անձնավորություն է: Ուժեղ փաստաբանությունը ոչ բոլորին է ձեռնտու: Մինչդեռ փաստաբանության զարգացումն ու կայացումը երկրի արդարադատության համակարգի կայացման գրավականներից են:

Լուսանկարը` Գագիկ Շամշյանի