Արմեն Մովսիսյանի պատասխանը` Արամ Մանուկյանին. «Որևիցե կոպեկ չի կարող կորչել այդտեղ»

ՀԱԿ պատգամավոր Արամ Մանուկյանը այսօր Կառավարության հետ հարցուպատասխանի ընթացքում 4 հարց էր ձևակերպել գազի գնի վերաբերյալ։

1. «Հայռուսգազարդ ՓԲԸ-ի պաշտոնական թվերում 2012 թ-ի կուտակված պարտքը 160 մլն դոլար էր, դուք այն պայմանագրի մեջ դարձրել էք 155 մլն դոլար: Ո՞ւր է կորել մոտավոր 2 մլրդ դրամը:

2. Գազի գնի թանկացման վերջին պայմանագիրը ապրիլի 1–ից էր, և մենք սկսել էինք վճարել հուլիսi 7-ից: Ո՞վ է վճարելու այդ տարբերությունը: Որքա՞ն է կազմում այդ տարբերությունը 3 ամիս չմուծելու և վերջին ամիսների համար: Որքա՞ն է կազմում այդ պարտքը, և ո՞վ է մուծելու այս տարվա գոյացած պարտքը, քանի որ 155 մլն դոլարը միայն 2012 թ-ին գոյացած պարտքի համար է, որ 20 %-ի ձևով տրվել է Գազպրոմին։

3. Մեր տնտեսագիտական հաշվարկներով` 20 %-ը կազմում է 240-260 մլն դոլար։ Ո՞վ է գնահատել Հայաստանի սեփականության 20 %-ի արժեքը` 155 մլն դոլար։ 100 մլն դոլար նվազագույնը պակաս է գնահատվել:

4. 20 %-ի հետ կապված` ՓԲԸ-ը օբյեկտիվ կամ այլ պատճառներով 65 մլրդ դրամ պարտք է կուտակել է: Հայաստանի կառավարությունն այս ՓԲԸ-ի մասնաբաժնից ունի 20 %, և 20 % մասնաբաժնի տերը մուծել է ամբողջ պարտքի համար, այսինքն` հայ ժողովրդի, քաղաքացիների սեփականությամբ 100 %-ով։ ՓԲԸ-ի տրամաբանությունը այսպիսին է` օգուտները և վնասները հավասարապես բաժանվում են հիմնադիրների մեջ, և Հայաստանի Կառավարությունը եթե պետք է մուծեր պարտքը, ապա գոյացած պարտքի իր մասնաբաժնի չափով պետք է մուծեր ընդամենը: ՀՀ Կառավարությունը 100 %-ով մարել է մասնավոր ընկերության պարտքը:

ՀԱԿ պատգամավորի հարցերին փորձեց պատասխանել Էներգետիկայի և բնական պաշարների նախարար Արմեն Մովսիսյանը.

«Գազի գնի բարձրացման հետ կապված հարցերը առաջացել են 2011թ-ից, երբ Գազպրոմ ընկերությունը հատարարեց, որ գները պետք է բարձրացնեն նաև ՀՀ-ի համար։ 2011-ին կարողացանք բանակցել ռուսական կողմի հետ, որպեսզի Հայաստանում գազը շարունակենք վաճառել սահմանի վրա 180 դոլարով, մինչև բանակցություները ավարտենք և որոշենք, թե ինչ ենք անում երկարատև 5 տարվա կտրվածքով գազի գնի գոյացման և նաև առաջացած պարտքերի հետ։ 2011-ից այս բանակցությունները շարունակվեցին մինչև հիմա, և արդյունքում եղավ այն, որ գազի գինը դարձավ 189 դոլար և 30 % մաքսային տուրքերից Ռուսաստաը կազատի Հայաստանին, այսինքն` առաջիկա 5 տարվա համար այդ թիվը կազմում է շուրջ 800 մլն դոլար։

2011-ից առ այսօր առաջացած պարտքը կազմում է մոտ 300 մլն դոլար: Մեր պայամանվորվածության համաձայն` ռուսական կողմի հետ պարտքի մի մասը մենք ենք փակում, մի մասը` իրենք: Այսինքն մոտավորապես կեսը մենք ենք փակում, կեսը` իրենք։ Սա է ամբողջ սխեման, որն էլ ներկայացրի: Այսինքն՝ 2011-ից մինչև 2018 թ-ը ռուսական կողմի վրա այդ բեռը կնստի 1,1 մլրդ դոլար, որից ՀՀ-ը 155 մլն առ այսօր գոյացած պարտքի կեսը կվճարի ինքը: Կամ պետք է 155 մլն-ը առձեռն վճարեինք, կամ էլ ինչ-որ ձևով մարեինք դա»,-ասաց նախարարը:

Պատգամավորը պատասխանից հետո հերթով կրկնեց վերը ասվածը և խնդրեց պատասխանել իր հնչեցրած կոնկրետ հարցերին:

Արմեն Մովսիսյանը բերված թվերի վերաբերյալ ասաց.

«Ինչ վերաբերում է 63, 65 մլրդ-ին, հիմա չեմ կարող ասել, բայց խոստանում եմ` կճշտեմ կասեմ: Որևիցե կոպեկ այդտեղ կորչել չի կարող»: