Ուկրաինայի իշխանությունները պատրաստ են քննարկել արտահերթ ընտրությունների անցկացման հարցը

Ուկրաինայի իշխանությունները պատրաստ են քննարկել արտահերթ ընտրություններ անցկացնելու վերաբերյալ ընդդիմության պահանջը: Այս մասին, ինչպես տեղեկացնում է «Украинская правда»-ն, հայտարարել է երկրի փոխվարչապետ Սերգեյ Արբուզովը:

«Ես հնարավոր եմ համարում նման պահանջի քննարկումը, երբ մենք նստենք բանակցությունների սեղանի շուրջ: Ես կարծում եմ, որ մենք պատրաստ ենք դա քննարկել»,-ասել է կառավարության ներկայացուցիչը: Միաժամանակ, նա նշել է, որ ստեղծված իրավիճակում բանակցություններն անհրաժեշտ են: 

Նշենք, որ Կիևում և ուկրաինական այլ քաղաքներում ընթացող ցույցերի ժամանակ ընդդիմությունը պահանջում է երկրի կառավարչության հրաժարականը և Գերագույն ռադայում նոր ընտրությունների անցկացում: 

Նշենք, որ հերթական նախագահական ընտրություններն Ուկրաինայում կայանալու են 2015-ին, իսկ խորհրդարանականը` 2017-ին: