Քննարկվել են ջրամբարների անվտանգության հարցերը

Դեկտեմբերի 6-ին ՀՀ ԱԻ նախարար Ա. Երիցյանի մոտ տեղի է ունեցել «Ջրամբարների պատվարների անվտանգությունը» թեմայով խորհրդակցություն:

Հրավիրված էին ՀՀ ԱԻՆ փրկարար ծառայության, «Սեյսմիկ պաշտպանության ծառայություն» գործակալության, Տեխնիկական անվտանգության ազգային կենտրոնի, Հիդրոմետի, տարածքային կառավարման նախարարության ջրային տնտեսության պետական կոմիտեի, ԳԱԱ երկրաֆիզիկայի և ինժեներային սեյսմաբանության ինստիտուտի և Երևանի պետական համալսարանի ներկայացուցիչներ:

Ողջունելով մասնակիցներին՝ ԱԻ նախարար Ա. Երիցյանը նշեց, որ ջրամբարների անվտանգությունը կարևոր ու արդիական թեմա է.

- 2012 թ. Հայաստանը մեր նախարարության շնորհիվ ճանաչվել է կարճ ժամանակում նշանակալի ձեռքբերումների երկիր, իսկ ԱԻՆ ճգնաժամային կառավարման կենտրոնը համարվում է աշխարհում լավագույններից մեկը: Շուտով կունենանք հայ-ռուսական մարդասիրական արձագանքման կենտրոն: Գառնու երկրաֆիզիկական դիտարանը վերականգնման փուլում է և շուտով կվերածվի միջազգային գիտահետազոտական կենտրոնի: Ունենք նաև լավ միջազգային համագործակցություն: Ուզում եմ՝ ձեզ էլ օգտակար լինենք, փոխանակենք ունեցած տվյալները: Եկեք միասին արդյունավետ քննարկում ծավալենք ու միասին աշխատելով փորձենք լուծումներ գտնել: Չէ՞ որ այդ ջրամբարների շուրջ մարդիկ են ապրում, ու եթե, Աստված չանի, մի աղետ պատահի, մենք լուրջ խնդիրներ կունենանք:

ՀՀ ՏԿՆ ջրային տնտեսության պետական կոմիտեի աշխատակազմի ղեկավար Մ. Մկրտումյանը, շնորհակալություն հայտնելով ԱԻ նախարարին այս թեմային անդրադառնալու համար, մասնավորապես ասաց.

- Մենք շատ տպավորված ենք այստեղ տեսածով և շատ ենք կարևորում ԱԻՆ աշխատանքը: Մենք դա տեսնում ենք ու զգում: Մեր կողմից որոշ քայլեր արվում են՝ վերականգնվել է Մարմարիկի ջրամբարը, նախատեսվում է նորոգել ևս 4-ը, սակայն մենք գիտենք, որ ԱԻ նախարարությունը համագործակցում է մի շարք միջազգային կառույցների հետ ու խնդրում ենք մեզ նույնպես աջակցել այդ հարցում:
Հանրապետության ջրամբարների զգալի մասը գտնվում է ջրային տնտեսության պետական կոմիտեի ենթակայության տակ, մյուսները՝ էներգետիկայի նախարարության, Երևանի քաղաքապետարանի կամ մարզային համայնքների, իսկ դրանց անվտանգության վերաբերյալ ուսումնասիրությունների տվյալներն անհրաժեշտ է թարմացնել: Առաջարկություն եղավ նաև ստեղծել ջրամբարների մշտադիտարկման ժամանակակից միասնական ցանց:

Խորհրդակցության արդյունքում որոշվեց ԱԻ նախարարությունում ստեղծել աշխատանքային խումբ, որն առաջիկա ամիսների ընթացքում, համապատասխան մարմինների հետ համագործակցությամբ կհստակեցնի ջրամբարների քանակը, պատկանելությունը, տեխնիկական վիճակը և համապատասխանությունը ներկայացվող անվտանգության պահանջներին, որից հետո բոլոր շահագրգիռ մարմինները միասին կքննարկեն հայտնաբերված խնդիրները լուծելու տարբերակները: