ԿԸՀ աշխատանքային խումբը հանդիպել է ՀԿ-ների ներկայացուցիչների հետ

Հայաստանի Հանրապետության կենտրոնական ընտրական հանձնաժողովը և միջազգային, տեղական դիտորդների կողմից ՀՀ ընտրական օրենսգրքի վերաբերյալ ներկայացված առաջարկություններն ուսումնասիրող աշխատանքային խումբը 2013թ. դեկտեմբերի 5-ից 7-ը կազմակերպում են ՀՀ ընտրական օրենսգրքի վերաբերյալ ներկայացված առաջարկությունների հասարակական քննարկումներ' քաղաքական կուսակցությունների, քաղաքացիական հասարակության կազմակերպությունների և զանգվածային լրատվամիջոցների ներկայացուցիչների համար:
Հանրային քննարկումներն անց են կացվում «Աջակցություն Հայաստանում երկու ընտրական փուլերին» ԵԱՀԿ ծրագրի շրջանակներում' ԵՄ ֆինանսավորմամբ:

Այսօր' դեկտեմբերի 6-ին, ՀՀ կենտրոնական ընտրական հանձնաժողովը և աշխատանքային խումբը հանդիպել են քաղաքացիական հասարակության կազմակերպությունների ներկայացուցիչների հետ:

Հանդիպման ընթացքում քննարկվել են մի շարք հիմնահարցեր, որոնք վերաբերում են ընտրողների գրանցմանը, ընտրացուցակների կազմմանը և հրապարակմանը, նախընտրական քարոզչությանը և քարոզչության ֆինանսավորմանը, լրատվամիջոցների կողմից ընտրական գործընթացների լուսաբանմանը, ընտրական վեճերի քննությանն ու լուծմանը, ինչպես նաև տեղական հասարակական կազմակերպությունների կողմից դիտորդական առաքելությունների իրականացմանը:

Հասարակական կազմակերպությունների ներկայացուցիչները ներկայացրել են ընտրական օրենսդրության ու ընտրական գործընթացների բարելավման վերաբերյալ իրենց դիրքորոշումներն ու առաջարկությունները:

2013 թվականի դեկտեմբերի 7-ի քննարկումներին մասնակցելու են ԶԼՄ ներկայացուցիչները: Հանդիպման վայրը' Երևան, «Անի Պլազա» հյուրանոց, ժամը 10.00-ից մինչև 13.00-ն: