Կնիքների կիրառումը կվերանա, իսկ նախագահի` 3-րդ անգամ վերընտրվելու հնարավորության մասին Տիգրան Մուկուչյանը տեղյակ չէ

2012-ից մինչև 2013 թվականը ՀՀ-ում տեղի ունեցավ երկու համապետական ընտրություն, որոնցից առաջինի` խորհրդարանական ընտրությունների ընթացքում առաջին անգամ կիրառվեց դրոշմակնիքների օգտագործումը:

Քվեարկությանը մասնակցած քաղաքացու անձնագրում դրվում էր կնիք, ինչը, սակայն, առաջին իսկ օգտագործումից հետո մեծ աղմուկ բարձրացրեց. կնիքները ցնդում էին րոպեներ անց: Նույն խնդիրն առաջ եկավ նաև 2013-ի նախագահական ընտրությունների ժամանակ, սակայն այս անգամ կնիքը ոչ թե անհետանում էր, այլ` մաքրվում անձեռոցիկի միջոցով:

Եվ ահա այժմ ԿԸՀ-ն հանդես է եկել առաջարկությամբ` ընտրական գործընթացում չկիրառել ցնդող թանաք, բայց մինչ կկայացվի վերջնական որոշում այդ ժամանակահատվածում դրոշմակնիքի կիրառումը կշարունակվի:

Լուրեր.com-ի հետ զրույցում ԿԸՀ նախագահ Տիգրան Մուկուչյանը նշեց, որ կնիքների վերացման հարցը պայմանավորված է նաև նույնականացման քարտերի հետ:

«Նախ պետք է նկատել, որ պարզ դարձավ, որ մենք պարտավորված ենք արդեն նոր մոտեցումներ և նոր լուծումներ մշակել, որովհետև ՀՀ-ում ներդրվել է նույնականացման քարտերի ինստիտուտը, որոնք իրենց կառուցվածքով պլաստիկ քարտեր են: Սա նշանակում է, որ որպես անձը հաստատող փաստաթուղթ` քաղաքացին իր նույնականացման քարտով ևս կարող է մասնակցել քվեարկությանը, և թեկուզ զուտ տեխնիկական իրականացման առումով, հաշվի առնելով տվյալ քարտերի նյութը, թե ինչով են դրանք պատրաստված, ակնհայտ է դառնում մի բան` այդ քարտերի վրա որոշակի առումով չի կարող իրականացվել թանաքային դրոշմակնքում. անկախ թանաքի բաղադրությունից` պլաստիկի վրա անհնար է դրոշմակնքում կատարել»,-ասաց Մուկուչյանը:

Սահմանադրական բարեփոխումների արդյունքում նախագահի` 3 անգամ վերընտրվելու մասին հնարավոր փոփոխության վերաբերյալ Տիգրան Մուկուչյանը մեկնաբանություն չտվեց, նշելով, որ այդ մասին առաջին անգամ է լսում:

Մանրամասները՝ տեսանյութում.