Հրահանգված է կաթվածահար անել մայրաքաղաքը. ո՞ւմ կտապալեն Երևանում

Հայաստանի փոխադրողների միությունը քաղաքապետարանին սպառնացել է, որ եթե մինչև հունվարի 1-ը տրանսպորտի սակագինը չբարձրանա, իրենք գործադուլ կանեն: Փոխադրողների միության նախագահն ասել է, որ տրանսպորտի սակագնով զբաղվող հանձնաժողովը շատ դանդաղ է աշխատում և 3 ամսում ընդամենը 2 նիստ է արել: Քաղաքապետարանը պատասխանել է, որ դեկտեմբերին կլինի երրորդ նիստը, որը թերևս վերջինը կլինի, քանի որ այլևս անելու բան չկա:

Միաժամանակ, Հ. Եղիազարյանը սպառնացել է, որ եթե այսպես շարունակվի, մարդիկ մի օր արթնանալու են ու չկարողանան հասնել աշխատանքի, քանի որ փոխադրողներն ուղղակի կհրաժարվեն մեքենաները վարելուց:

Նա նաև հայտարարել է, որ սպառողն անմիջապես չի կարող իր մաշկի վրա զգալ որակի բարելավումը: Ըստ էության, հայտարարվում է, որ թանկացումը հազիվ փակում է փոխադրողների վնասները` ուղղակիորեն հերքելով քաղաքապետարանի քարոզչական թեզը, թե թանկացումը պայմանավորված է նաև տրանսպորտի որակի բարելավմամբ: Ստացվում է, որ որակի բարելավումը հաշվարկված չէ նոր սակագնում: Ստացվում է, որ քաղաքապետարանի հայտարարություններն ընդամենը քարոզչական բլեֆ են:

Ինչևէ, փոխադրողները սպառնում են պարզապես գործի դուրս չգալ, իսկ քաղաքապետարանը լռում է: Լռում է, որովհետև գործ ունենք պարզունակ շանտաժի հետ, երբ չկարողանալով թուլացնել թանկացումների դեմ ծավալվող բողոքի ալիքը` գծատերերին հրահանգվում է սպառողին վախեցնել կանգառներում դժոխային տեսարանների ահարկու տեսլականով:

Ի վերջո, ի՞նչ արեց քաղաքապետարանի ստեղծած չարաբաստիկ հանձնաժողովը` բացի գծատերերի շահերը ըմբռնող մի քանի դատարկ հայտարարությունից և ալարկոտ, անժամկետ, անպտուղ քննարկումներից: Վստահաբար, միայն ժամանակ սպանեց, հուսալով, որ բողոքի ալիքը կմարի, համապատասխան քարոզչությունը կբթացնի մարդկանց ցասումը, և մինչև տարեվերջ գծատերերի մուրազը փորում չի մնա: Բայց մարդիկ այնքան ապիկար դուրս եկան, որ հսկայական քարոզչամեքենայի տիրապետելու պայմաններում անգամ չկարողացան նորմալ քարոզչություն ապահովել` ապացուցելով կառավարման հմտություններից զուրկ լինելու փաստը:

Հասարակության հետ կոմպրոմիսի և լայն ճակատով քննարկումների գնալու փոխարեն` քաղաքային իշխանությունները նախընտրում են դիմել շանտաժի: Նախկինում կանգառների մոտ էին ուղարկում իրենց ծանր հրետանին` կիսագրագետ, շողոքորթ ժպիտով, ամբողջ կյանքում միայն ռոճիկի հարց լուծած պաշտոնյաների, որոնք քաղաքացիական անհնազանդության դրսևորման ցանկացած երևույթ ընկալում են կերակրամանի պարունակության փոփոխության տեսակետից, և բացի հայհոյանքն ու գռմռոցը` որևէ հոդաբաշխ հակափաստարկ ակցիայի մասնակիցներին չէին կարողանում ներկայացնել: Այժմ հրահանգված է պարզապես կաթվածահար անել մայրաքաղաքի կարևորագույն ոլորտը, որպեսզի բնակչությունը ստիպված համակերպվի թանկացման հետ: Սա ուղղակի նվաճողի, գաղութատիրոջ հոգեբանություն է: Հակառակ պարագայում` քաղաքապետարանը շատ կոշտ կարձագանքեր գծատերերից ոմանց քարոզչական տրյուկին և կպահանջեր կատարել մրցույթով ստանձնած բոլոր պարտավորությունները` հակառակ պարագայում սպառնալով օրենքի լիարժեք կիրառում: Բայց քանի որ գծատերերի բոլոր թելերը տանում են քաղաքապետարան և իշխանության բարձրագույն օղակներ, հստակ է, որ այդ պարզունակ շանտաժը մտածված է հենց այդ օղակներում:

Ոլորտի իրական պատասխանատուները որևէ կերպ չեն արձագանքում հասարակական դժգոհություններին, որովհետև իրենց հաշվարկի մեջ եղել է կեսժամանոց մի քանի բողոքի դրսևորումներ: Այժմ, երբ դժգոհությունների ալիքը ձնագնդի պես տարածվում է և դուրս է եկել ֆեյսբուքյան վերահսկողությունից, այդ մարդիկ աչքերն են զարմացած ճպճպացնում, որովհետև հասարակության բողոքի ձայնը սկսել է խլացնել իրենց ստամոքսի գռմռոցը: Անգամ ինքնապաշտպանական բնազդը նրանց չի ստիպում գնալ զիջումների:

Սակայն մի փոքր քաղաքական հոտառությունը պետք է այդ պարոններին հուշեր, որ տրանսպորտի կաթվածահար վիճակը կստիպի մայրաքաղաքի բնակիչներին հրաժարվել աշխատանքի դուրս գալուց, ինչն իր հերթին կաթվածահար կանի ամբողջ պետական համակարգը` դառնալով համազգային գործադուլի պատճառ:

Ուկրաինան քթերիդ տակ է, տեսեք, թե ինչպես տապալեցին Լենինի արձանը: Մեզ մոտ չկա Լենինի արձան, Աստված գիտի, ում կտապալեն...

Այնպես որ, չինովնիկնե՛ր, մտածե՛ք խոսելուց առաջ: Եթե պախանների հրամանից դուրս մտածելը անհաղթահարելի խոչընդոտ չէ...

Վարուժան Բաբաջանյան